Hatibû îdiakirin ku Mazlûm Ozlu yê li Mêrsînê rûdinê û ji Colemêrgê ye, di 17’ê Nîsanê de dema li navçeya Erdîşê ya Wanê leşkerî dikir întihar kiriye. Malbata Ozlu, bi lêv kir ku tu pirsgirêkên kurê wan tune bû, loma ji ber vê bûyerê şik û gumanên wan hene. Malbata Ozlu xwest demildest bûyer bê zelalkirin. 

 

'HEVALÊN WÎ JÎ GOTIN EM HEYIRÎ MAN’ 

 

Bav Siddik Ozlu ku piştî bûyerê çû yekîneya ku kurê wî lê leşkerî dikir, destnîşan kir ku ew bawer nake ku kurê wî întihar kiribe. Bav Ozlu, bi lêv kir ku ew çûye cihê ku kurê wî lê întihar kiriye û bi hevalên wî re axiviye. Bav Ozlu got: “Min birîna wî nedît. Lê belê xalên wî gotin gule di bin çeneya wî re ketiyê û di serê wî re derketiye. Min bi 6 hevalên wî yên leşkeriyê ku bi hev re samîmî bûn re axivî. Min ji wan pirsî ‘meseleyeke kurê min hebe? Derûniya wî çawa bû?’ Lê belê hevalên wî gotin ‘Tu çawa ne li benda tiştekî wisa bûyî, em jî ne li bendê bûn. Wekî te em jî heyirî mane. Me bawer nedikir ku dê tiştekî wisa bike, lê întihar kir.’ Hevaleke wî ya jin hebû. Gelo di navbera wan de pirsgirêk çêbûye, an tiştekî din heye. Me jî fêm nekir. Min bi hevalê wî yê ku herî dawî ew dîtiye re axivî. Got, ‘Me bi hev re xwarin xwar. Paşê nobeta min û wî bi hev re bû. Tenê di navbera me de 5 metre hebû. Nêzî nîv saetî ez di qulûbeyê de mam. Diviya ez saetekê bisekiniyanama, lê piştî nîv saetê şûnde hevalê min gazî min kir, got were ez ê biçim. Ez jî daketim. Dema di wir re derbas bûm min li qulûbeya wî nerî. Wî jî dema berê xwe da min dengê çeke hat.’ Fermandarên wî jî gotin ‘me jî di qulûbeyê de heta dozger nehat dest nedaye.’” 

 

‘EGER ÎNTIHAR KIRIBE JÎ NE BÊ SEDEM E’ 

 

Bav Ozlu jî, diyar kir ku di warê întiharê de şik û gumanên wî hene û got: “Di heman rojê de birayê wî pê re axiviye. Telefona wî di dest dozgeriyê de ye. Ji bo şik û gumanên me ji holê rabin, em li bendê ne ku telefona wî bê lêkolînkirin. Ne bê sedem e. Eger kurê min întihar kiribe jî helbet ev ne bê sedem e. Parêzer dibêje ‘hela em agahiyan ji dozger bigirin em ê li gorî wê tev bigerin.’” 

 

‘BILA BÊ AŞKEREKIRIN’ 

 

Kekê wî Azadî Ozlu jî, diyar kir ku berî birayê wî biçe leşkeriyê ji jiyanê hez dikir û girêdayî jiyanê bû. Kek Ozlu, anî ziman ku birayê wî kesekî hêmin bû û kesekî wisa bû ku tiştekî ku malbata wî nerihet bike qet nedigot. Kek Ozlu got: “Beriya wê bi rojekê bi min re peyivî. Min li rewşa wî pirsî. Got, tu pirsgirêkek wî tune ye. Hîn jî ji ber vê bûyerê em metelmayî ne. Axirê me bi çavê xwe nedîtiye, lê tiştekî wisa çawa çêbû. Li wir nêvengeke çawa hebû, ev tişt çawa çêbû hîn jî em nizanin. Êdî em ê li gor agahiyên dozgeriyê û parêzeran fêm bikin. Eger di vê bûyerê de îhmalkarî hebe bila bê aşkerekirin. Hindik be jî şik û gumanên me hene. Axirê dema mirovek xwe bikuje zehmet e. Ji bo tiştekî wisa bike divê aqil û mantiqa wî nebaş be. Loma em dixwazin demildest bûyer bê aşkerekirin. Eger îhmalkarî hebe bila bê aşkerekirin. Eger ev cinayet be jî bila kiryarên wê bên aşkerekirin. Wekî me got hindik be jî du îhtimal hene. Loma em dixwazin demildest bê aşakerekirin.” 

 

MA / Haci Yusuf Topaloglu