NAVENDA NÛÇEYAN - Rêveberiya Xweseriya Demokratîk a Kantona Efrînê bang li Rêxistina Mafên Mirovan a Navnetewî û Yekîtiya Ewrupa (YE) kir ku nûnerên xwe bişînin Efrînê da dagirkerî û hovîtiya komên girêdayî Tirkiye bi dawî bikin

 

Rêveberiya Xweseriya Demokratîk ya Efrînê têkildarî hovîtî û dagirkeriya komên girêdayî Tirkiye ya li Efrînê, bang li Rêxistinên Mafê Mirovan a Navnetewî û Yekîtiya Ewropayê kir ku nûnerên xwe bişînin Efrînê û terora li wir bi xwe bibînin. 

 

BANGA RÊVEBERIYA XWESER A DEMOKRATÎK WIHA YE: 

 

"Artêşa Tirk a dagirker û çeteyên wê li Kantona Efrînê kiryarên hovane didomînin û zagonên navneteweyî binpê dikin. Di encamê de bi hezaran sivîl ji warên xwe hatin koçkirin û li herêmên bi ewle bi cih bûn. Vê yekê hişt ku herêm ji niştecihên xwe yên resen vala bibe. Dagirkeriya Tirk vê rewşê li gorî berjewendiyên xwe bi kar tîne û li herêmê siyaseta guhertina demografiyê dide meşandin. Di vê çarçoveyê de malbatên çeteyên dewleta Tirk li şûna gelê Efrînê têne bicihkirin.  Ev gaveke pir xetere ji aliyê dagirkeriya Tirk ve û pir eşkere 50 malbatên çeteyan ji Xûtaya rojhilat li herêma Cindirêsê bi cih kir. Artêşa dagirker 21'ê Nîsanê gundê Berava yê girêdayî navçeya Şera ji şêniyên wê vala kirin û veguhestin gundê Çema bi cih kirin.  

 

Malbatên çeteyan li taxên Mehmûdiye û Vîllat ên bajarê Efrînê jî hatin bicihkirin. Tê zanîn ku hezar û 148 çete tevî malbatên xwe ji herêma Qelemon a dikeve rojhilatê Şamê hatin û li Kantona Efrînê bi cih bûn. Hezar û 200 çeteyên Heyet Tehrîr El-Şam û Hereket Ehrar Şam ji herêmên Cîrod, Nasiriye, Rehbiye ber bi herêmên Bakurê Sûriyê ve hatin rêkirin. Artêşa Tirk a dagirker ji roja 18'ê Nîsanê ve bi hevpeyama Tirkî-Rûsî bi sedan malbatên çeteyan ji gundewarên Şamê anîn û li Efrînê bi cih kirin. Malbatên Tirkmen ên ji Iraqê  li navçeya Şiyê bi cih kirin. Li aliyekî din jî dagirkeriya Tirk destûr nade ku welatiyên Efrînê yên ku li çolê rewşeke dijwar dijîn û neçar dibin ku berê xwe bidin malên xwe yên li Efrînê, derbas bibin.  Siyaseta guhertina demografiyê axa Sûriyeyê parçe dike. 

 

HEBÛNA DAGIRKERIYA TIRK JI BO SÛRIYE Û CÎHANÊ XETERIYEK MEZIN E 

 

Dewleta Tirk a dagirker êrîşeke barbarî bi ser gelê Efrînê yê bi ewle de anî û bi vê yekê hemû zagonên navneteweyî binpê kirin. Hebûna dagirkeriya Tirk li Efrînê xetereyeke mezin li ser Sûriyê û cîhanê ava dike, ji ber ku derfet dide ku komên çete ji nûve hêza xwe kom bikin. Dewleta Tirk, li herêmê siyaseta Tirkirinê dide meşandin. Navên navend û saziyan veguhertin Tirkî. Armanca artêşa Tirk a dagirker û çeteyên wê qirkirina gelê Sûriyê (taybet gelê Kurd), derxistina fitenyan di navbera gelê Sûriyê de. Ev kiryar xizmeta berjewendiyên dewleta Tirk a faşîst dike. Wek Rêveberiya Xweseriya Demokratîk a Kantona Efrînê, banga me ji rêxistina mafên mirovan a cîhanê û DYE re heye ku dagirkeriya Tirk û guhertina demografiyê rawestînin. Daxwaza me heye ku rewşa Efrînê wekî berê bi ewle bibe û civakeke demokratîk were avakirin. Kiryarên ku dagirkeriya Tirk li Efrînê pêk tîne, zagonên navneteweyî û mafên mirovan binpê dikin. Divê  Divê hun nûnerên xwe bişînin Kantona Efrînê da hovîtiya dagirkeriya Tirk li herêmê bibînin." 

 

NAMEYEK JI SEKRETERIYA GIŞTÎ YA EREBAN RE JÎ ŞAND

 

Rêveberiya Xweseriya Demokratîk a Kantona Efrînê name ji bo Sekreterê Giştî yê Komkara Ereban Ehmed Ebû El-Xeyîz re jî şand. Di nameyê de ji Komkara Ereban hat xwestin ku sînorekî ji polîtîkayên dewleta Tirk ên  li Sûriyeyê deynin û dengê gelê Efrînê bighînin tevahî cîhanê.

 

NAME WIHA YE: 

 

"Birêz Sekreterê Giştî yê Komkara Ereban Ehmed Ebû El-Xeyîz; we di Civîna Qudis-Tehran a Komkara Ereban de gotibû:? Xeteriyên mezin ên ku li beramberî me ne di heman girîngî û xeteriyê de ne” em bi bîr tînin û em jî parçeyekî ku li beramberî vê xeteriyê ne. Dewleta Tirk ji destpêka aloziya Sûriyeyê ve li hemberî gelê Sûriyeyê dixebitê, hewlda ku navbera gelên Sûriyeyê de nakokî derxîne, bi awayekî eşkere destek da terorê, hinek aliyên Sûriyeyê ji bo berjewendiyên xwe da bikaranîn. Polîtîkayên ku Tirkiyê niha li Sûriyeyê dide meşandin dirêjahiya pêvajoya Osmaniyane ku desthilatdariya wan li ser herêmê 40 salî berdewam kir. Di pêvajoya desthildatdariya Osmaniyan li ser Rojhilata Navîn fitin û fesadî di nava gelên herêmê de belav bû û her kesî di encama polîtîka qirkirine ya Osmaniyan de çand û zimanê xwe wenda kirin, zimanê erebî jî yek ji zimanê ku bû hedefa polîtîka qirkirine ya Tirkiyê.

 

- Gelê Kurd û hemû pêkhateyên Sûriyeyê Ereb, Suryan, Ermen, Keldan û Aşûr xebitîn ku li ser bingehê sîstemeke demokratîk jiyaneke hevbeş ava bikin û li Sûriyeyê dawî li herandina xwîne bînin.

 

-Dewleta Tirk li Bakurê Sûriyeyê êrîşî projeya pêşeroja Sûriyeyê, yekîtî û aramiya herêmê kir, em parçeyekî ji gelê Sûriyê û welatê Sûriyê ne, em ji bo ewlehî û aramiya Sûriyeyê têdikoşin, li hemberî DAIŞ û çeteyên mîna wê em li ber xwe didin. Ji bo parastina giştî welatê Sûriyeyê me bi hezaran şehîd dan, em naxwazin welatê me jî mîna Iraq, Lubnan, Lîbya û Yemen ji ber pevçûnên mezhebî parçe bibe û mîna van welatan lê were.

 

-Nêzî du mehan bajarê Efrîne û gelê wê bi hemû cureyên çekan û balafiran hat topbaran kirin û bombebaran kirin, zagonên navdewletî di vê êrîşa li ser Efrîne hatin ihlal kirin, jêrzemîna Efrîne weke nexweşxane, dibistan, ciyên pîroz ên baweriyê, bendava Meydankê (bendava 17 Nîsan) û avahiyên gel hatin topbarankirin û bombebaran kirin.

 

- Tirkiyê dixwazin li Sûriyê terorê biparêze, di wextê ku DAIŞ`ê têkdiçû û gihîştibû dawiya xwe Tirkiyê êrîşî Efrîne kir û xwest DAIŞ dîsa bibe xwedî hêz. Kesên ku ji Xûta, Doma û Qelemûn derketin ew pêşwazî kirin û li Idlibê û Efrîne bi cih kirin. Niha jî destbi hemleya fitin û cûdahî xistina navbera pêkhateyên herêmê kiriye. Berî du sed salan heman polîtîka li hemberî gelan dida meşandin. Niha li Efrîne polîtîka guhertina demografiya dide meşandin û ev polîtîka ewlehî û aramiya pêkhateyên herêmê tehdîd dike.

 

-Mayîna Tirkiyê li Sûriyê û alîkariya wê ji gurûpên terorparêz re li ser yekîtiya Sûriyê û tevahiya Rojhilata Navîn xeterî ye. Polîtîka Tirkiyê parçekirina yekîtiya Sûriyeyê destekê dide terorê û wan bi hêz dike.

 

-Em weke Rêveberiya Xweser a Demokratîk a Efrîne bi saziyeke ji bo yekîtiya dewletan dixebitê name rêkirin, ciyê serbilindiyê ye. Me çawa 7 salan parastina yekîtiya Sûriyeyê kir em niha jî amade ne ku parastina yekîtiya Sûriyeyê bikin. Her wiha em ji Civîna Komkara Ereban daxwaz dikin ku ji polîtîkayên Tirkiyê yên li Sûriyeyê dide meşandin, sînor deynin, dengê gelê me yê Efrîne û Sûriyeyê bighînin tevahiya cîhana Ereban, polîtîkayên dagirkeriya Tirkiyê li Efrîne weke ferzkirina zimanê tirkî, guhertina demografî taşîr bikin. Projeya me ya li Sûriyeyê afirandina aramî û demokrasiyê û ji bo tevahiya Sûriyeyê pêşerojeke bi ewle didome. Gelên Sûriyeyê bi xwe ji bo pêşeroja Sûriyeyê danûstandin bikin baştire ku ji derve destwerdan çêbibe. Destwerdana ji Sûriyeyê re dibe sedema ku welatê Sûriyeyê parçe bibe, neghîje aramiyê. Em dixwazin gelên Sûriyeyê bi hev re wekhev û demokratîk bijî."