STENBOL – Seroka Şaxa ÎHD'ê ya Stenbolê Prz. Gulseren Yolerî, bertek nîşanî dirêjkirina cara 7'emin ya OHAL'ê da û wiha got: “Îktîdar dixwaze OHAL'ê bike perçeyekî jiyanê. Bi OHAL'ê dixwaze sûcê xwe veşêre.
Wezareta Karên derve ya DYA, di rapora salane ya karneya mafên mirovan de, rexneyên giran li Tirkiye kirin. Di rapora ku li ser 200 welatan lêkolin kiriye de li ser Tirkiye 64 rûpel rapor amade kiriye. Di raporê de hat diyar kirin ku li Tirkiye OHAL bê navber tê dirêjkirin û her dem zextên azadiya raman û îfadeyê li ser civak û saziyan zêde dibe. Têkildarî rapora DYA û rewşa OHAL'ê Seroka Komeleya Mafên Mirovan (ÎHD) ya Stenbolê Gulseren Yolerî, nirxandinên girîn kirin. Yolerî, diyar kir ku ji roja OHAL hat îlankirin ve binpêkirina mafan dest pê kir û heta niha her ku diçe zêde dibe. Yolerî, diyar kir ku di serdema OHAL'ê re raporê binpêkirina mafan amade kirin û bi raya giştî re parve kirin û wiha got: "Niha cara 7'emîn OHAL hat dirêjkirin. Ji ber vê yekê fikarên me zêde ne. Îktîdar, bi dirêjkirina OHAL'ê dixwazin bikin perçeyekî jiyanê yê asayî. Ewil ji bo 3 mehan OHAL îlan kir. Ewil bi gotina ‘Gazincê kesî ji OHAL’ê tune de' û dîsa dirêj kirin û Niha dixwazin OHAL’ê rewa û asayî bikin. Dixwazin bikin perçeyekî jiyanê. Em behsa Tirkiye ku bi Biryarên di Hukmê Qanûnan de (KHK) bi rêve dibe dikin. Ev pêvajo êdî wekî asayî ye dide xuyakirin. Lê ne wisa ye. Ev yek fikarên di milê parastina mafên mirovan, hiqûq, edalet û demokrasiyê de fikarên zêde pêş dixe. Bi taybetî piştî biryara hilbijartina pêşwext fikarên me zêdetir bûn. Ji ber ku hilbijartin dê di nava OHAL'ê de pêk bê. Dixwazin OHAL'ê bikin wekî şeklê jiyana xwezayî û asayî. Ev pêkanina OHAL'ê bi tevahî Mafên Mirovan dixe bin gefan. Dê bi xwe re bêtir krîza siyasî, aborî û leşkerî pêk bîne.
‘DIXWAZIN CIVAKÊ BI ZEXTAN BI RÊVE BIBIN'
Yolerî, anî ziman ku li ser jiyana civakî zextên gelek zêde hene û wiha berdewam kir: "Îktîdar bi armanca daxwaz û xeyalên xwe yên civaka oldar têxe meriyetê, fikr û daxwazên xwe li ser hemû civakê ferz dike û ji bo vê yekê jî zextan li ser civakê zêde dike. Di qada perwerdehiyê de her dem daxwaza guhertinê dike. Hemû civaka muxalif xistiye bin zextan. Dixwaze civaka muxalif bêdeng bike û bi zext û zorê bi rêve bibe. Bi armanca ser sûcê xwe bigire OHAL'ê dîsa dirêj dike. Wekîl tên girtin. Ev îhlala Qanûna Bingehîn e. Dîsa xebatkarên cemaweriyê tên îxrackirin. Lê li holê daraz û hiqûq tune ye. dest datîne ser mal û milkê saziyan. Li holê hiqûq û daraz tune ye. Bi her awayî îktidara AKP'ê zextan li ser civakê dike. Bi rêbaza OHAL’ê dixwaze civakê têxe bin kontrola xwe."
PERGALA KU AKP PIŞTÎ HILBIJARTINA 24'Ê HEZÎRANÊ TÊXE MERIYETÊ Û OHAL HEMAN TIŞT E
Yolerî, da zanîn ku ger OHAL rabe û îktîdar dîsa hilbijartina 24'ê Hezîranê qezenç bike jî dîsa dê pergala xwe têxe meriyetê û wiha got: "Pergala ku îktîdar diparêze û OHAL ji hev ne cûda ye. Hemû erk û rayeya di destê meclîsê û wezîran de dê di destê Serokomar de kom bibe. Her tişt dê têkeve destê yek mirovî û êdî OHAL rabe jî dê tiştek neyê guhertin. Ger ku di vê hilbijartinê de AKP bi ser bikeve, êdî kes nikare venertinê bike. Divê her kes vê pergalê lêpirsîn bike û li gorî wê helwestê nîşan bidin. "
Yolerî rapora DYA ya der barê Tirkiye û OHAL'ê de jî nirxand û wiha got: "DYA di rapora xwe de diyar dike ku OHAL hat dirêj kirin û îşkence zêde bûye. Diyar dike ku mafên mirovan ên bingehîn hatiye binpêkirin. Ger ku îro em bi hêza xwe ya cewherî li dijî van pêkanînan dernekevin, dê bêtir xira bibe. Divê em dengê xwe li hemû cîhanê belav bikin. Divê em bêtir dengê xwe bilind bikin û bêtir îtîrazên xwe zêde bikin."
MA / Sadiye Eser - Ruken Tuncel