DERSIM - Dersimiyan hilbijartina zordest nirxand û diyar kirin ku divê li hemberî îtifaqa AKP-MHP'ê muxalefet bibe yek. Mehmet Demîr Pençeyê 93 salî, destnîşan kir ku eger îtifaqa AKP-MHP'ê di sindoqan de neyê binaxkirin dê hewldanên wekî komkujiya 38'an rû bidin. 

 

Dersimiyan der barê hilbijartina zordest a 24'ê Hezîranê de axivî û destnîşan kirin ku divê muxalefet demildest li dor blokekê bên gel hev û bibe yekdeng. Zîlan Ateş, diyar kir ku krîza aborî kûr bûye û heta derekê dikarin mirovan bixapînin, lê belê ji niha û pê ve dê nikaribin bixapînin. Ateş, bi lêv kir ku AKP û MHP ji bo xwe biparêzin ber bi hilbijartineke zordest ve çûne û got: "Bi ya min ligel evqas tiştî jî faktora herî sereke jî êrîşên li ser Efrînê ne. Êrîşên li ser Efrînê kir ku êdî nikaribin welat bi rê ve bibin. Li Tirkiyeyê bû cihê şikestineke mezin." 

 

‘EGER MUXALEFET BIBE YEK DÊ HILBIJARTIN VALA DERKEVE' 

 

Ateş hin pêşniyar li muxalefetê kirin û got: "Li hemberî van tiştan hemûyan divê muxalefetek ku li hemberî îtifaqa AKP-MHP'ê bibe yek hebe. Lê belê bi rastî jî niha li Tirkiyeyê tenê partiyek heye ku muxalefetê dike. Ew jî HDP ye. Lê dîsa jî eger hemû muxalefet bê cem hevdu dê hilbijartina zordest li valahiyê derxîne. Piştî vê saetê êdî qîmeta axaftina zêde, nirxandinên zêde tune ye. Tenê tiştek heye, ew jî muxalefeta li dijî vê îtifaqa qirêj e." 

 

‘TEKANE ÇAREYA AKP-MHP'Ê HILBIJARTINA ZORDEST BÛ' 

 

Adnan Guneş parast ku Erdogan rewşa heyî baş dixwîne û got: "Rewşa aboriyê nebaş e. Hemû têkiliyên bi derve re qut bibûn. Tekane çare hilbijartina zordest bû. Lê ji niha û pêve tenê tiştek heye ku bê kirin. Ew jî divê muxalefet mutabiq be û namezetekî hêzdar nîşan bide. Divê gel jî li hemberî vê hilbijartina zordest li gel muxalefetê be û bi hev re ji derheqê vê yekê derkevin." 

 

‘EGER MUXALEFET BIBE YEK DÊ BI SER KEVE' 

 

Abdurrahman Tûna jî, diyar kir ku eger muxalefet bibe yek dê di hilbijartina zordest de bi ser bikeve û got: "Hilbijartineke ku di serdema Rewşa Awarte de bê kirin, ew hilbijartin bi qisûr e. Ji ber ku Tirkiye têk çûye hilbijartin tê kirin. Erdogan bi xwe jî van tiştan dibêje. Di nav 2 mehan de tenê tiştek heye ku bê kirin. Ew jî îtifaqeke hêzdar ku karibe îktîdarê têk bibe."

 

Bulent Yuksel jî diyar kir ku hilbijartina zordest nîşan dide ku îktîdar xitimiye û got: "Nemaze jî operasyona Tirkiyeyê ya li hemberî Efrînê, li herêmên kurdan sepandina polîtîkaya şidetê krîz aborî bi xwe re anî. AKP bi hilbijartineke zordest, hewl dide xwe xilas bike. Lê belê li hemberî vê yekê îtifaqa muxalefetê bivê nevê ye. Muxalefet bi îtifaqê dikare îtifaqa AKP-MHP'ê pûç bike." 

 

‘JI BO SERKETINM YEKÎTÎ ŞERT E' 

 

Mehmet Demîr Pençeyê 93 salî jî destnîşan kir ku di biryardayîna ji bo hilbijartinê de faktora sereke têkçûyîna aboriyê û polîtîkaya dijminahiyê ya li hemberî kurda ye û got: "Ji ber ev tişt hene êdî nikare serokomariyê bike. Ji ber vê mecbûr bû hilbijartinê bike." 

 

‘DIVÊ KURD ÎTIFAQA QIRÊJ DI SINDOQAN DE BINAX BIKIN' 

 

Demîr, diyar kir ku ji bo serketina hilbijartinê yekîtî şert e û got: "Çi karê Erdogan li Sûriyeyê hebû? Di ser 4 hezar mirovên ku li Efrînê kuştin de propagandayê dike. Yek ji faktorên girîng a hilbijartina zordest jî, polîtîkaya li hemberî Efrînê ye. Ji ber vê divê kurd dengê xwe nedin AKP'ê. Li herêmê Efrîn xeta sor bû. Divê kurd di vê hilbijartinê de îtifaqa AKP -MHP'ê di sindoqan de binax bikin. An jê dê rewşa Tirkiyeyê nebaştir bibe. Wê komkujiyên wekî 1937-38'an pêk bên. Divê gel hay ji van tiştan hebe û muxalefet jî tişta dikeve ser milê wê demildest bike." 

 

MA / Semra Turan