ŞIRNEX – Hevşaredara Cizîrê Leyla Îmret ku qeyûm tayînî şûna wê hat kirin, der barê pêkanînên li Efrînê yên bi destê hikûmeta AKP'ê ji aliyê OSO û komên selefî ve tên kirin got: "Gelê kurd ev polîtîkayên ku berê bi qeyûman xistin dewrê li pûç kirin."

 

Piştî êrîşên Hêzên Çekdar ên Tirk (TSK) û komên girêdayî wê OSO ku di 20 Çileyê de li hemberî Efrînê dan destpêkirin, bi deh hezaran welatiyên Efrînê neçar man koç bikin. Niha li şûna welatiyên hatine koçberkirin komên selefî û malbatên wan ên ji Gûtaya Rojhilatê hatin tehliyekirin tên bicihkirin. AKP'ê ji bo Efrînê gotibû em ê bi awayekî mayînde nemînin, lê belê niha walî tayînî wê kiriye û çend roj berê jî di bin banê Koalîsyona Netewî ya Hêzên Muxalif û Şoreşger (KNHMŞ) de "meclîsa herêmî ya demborî" hat îlankirin. 

 

Hevşaredara Cizîrê Leyla Îmret ku ji sedî 83 deng wergirtin û paşê qeyûm tayînî şûna wê hat kirin, destnîşan kir ku kurdan berê jî polîtîkayên bi vî rengî pûç kiriye û heman polîtîkayên ku li Efrînê û bajarên herêmê tên sepandin nirxandin. 

 

‘PERGALA GEL QEBÛL NAKIN' 

 

Îmret, bi lêv kir ku bi êrîşên li ser Efrînê re li wir jiyana azadîxwaz, demokratîk û ekolojîk a jinan hedef hatiye girtin û got: "Vê pergala ku ji aliyê gel ve hatiye avakirin qebûl nakin. Ji ber ku jiyaneke wisa ya li derveyî sînorê xwe jî qebûl nakin ev êrîş pêk anîn. Çimkî gelên Rojhilata Navîn vê pergalê qebûl dikin. Armanca sereke ya êrîşan jî ev e." 

 

‘QEYÛM JÎ BI HEMAN AWAYÎ TEVGERIYAN' 

 

Îmret bi bîr xist ku li Efrînê tabeleya kurdî ya Nexweşxaneya Avrînê hatiye daxistin û li şûna wê ya bi tirkî hatiye daliqandin. Îmret bi lêv kir ku li bajarên herêmê jî hema tişt xistin dewrê û li şûna hevşaredarên ku li bajarên herêmê bi dengê zêde hatin hilbijartin qeyûm hatin tayînkirin. Îmret got: "Tişta ku ewil qeyûman kir; tabelayên kurdî daxistin. Sazî û dezgehên ji bo jin û zarokan hatin vekirin hedef girtin. An girtin an jî hundurê wan vala kirin. Sazî li gorî fikrên xwe yên zayendîparêz û netewperest ji nû ve saz kirin. Heman rewş niha li Efrînê rû dide." 

 

Îmret, diyar kir ku li Efrînê hewldanên guherandina demografîk, berê di dema qedexeyên derketina derve de li bajarên herêmê jî hat xwestin têxin dewrê, lê belê ev yek pêk nehat. Îmret got: "Li ser gelê kurd polîtîkayên antî-demokratîk tên meşandin. Mesela piştî qedexe û rûxandinê gelê Cizîrê dîsa vegeriya malên xwe û xaka xwe. Bi vê yekê re ev polîtîkayên wan jî hatin pûçkirin. Lê niha jî polîtîkayên cezakirina gel tên meşandin. Dibêjin 'hûn ê wekî min bijîn û bifikirin.' Lê belê ev yek nayê qebûlkirin. Bi qeyûman re tê xwestin ku gelê me bê hêvî bibe." 

 

‘DÊ EV POLÎTÎKAYÊN ÇEWISÎNER, TUNEKIRINÊ û FAŞÎST BÊN ŞIKANDIN' 

 

Îmret, diyar kir ku kesên dixwazin bi mantiqa netewdewletê herêmên kurdan bi rê ve bibin di nav aloziyeke mezin de ne û wekî mîna jî dîroka hilbijartina giştî 24'ê Hezîranê da. Îmret, destnîşan kir ku dê gelê kurd bi sekna xwe van polîtîkayên çewisîner, tunekirinê û faşît bişikîne û got: "Dixwazin hemû mafên ku bi riyên demokratîk bi dest ketine desteser bikin. Çawa em li deverên ku qeyûm lê hatien tayînkirin van tiştan dibînin, heman tişt li Efrînê jî tên kirin. Êdî ev feraseta wan a ku dabeş bike, perçe bike bi rê ve naçe."