MÊRDÎN - H.K. diyar kir ku di Doza Nisêbînê de ji ber ku li birayê xwe Ş.K. ê hat darizandin destê xwe li ba kir rastî derp û gefên polîsên hêzên taybet hat. H.K. got ku polîsan berê çekê dan zikê wê û gefa ‘Ma em te bikujin’ lê xwarin.
2’yemîn danişîna doza 50’î kesên di 26’ê Gulana 2016’an, di dema qedexeya derketina derve ya li navçeya Nisêbîna Mêrdînê de hatin tehliyekirin û girtin di 20’ê Nîsanê de bi dawî bû. Danişîn 5 rojan berdewam kir û ketina malbatan a salona danişînê hat sînordarkirin. H.K. a xwest danişîna birayê xwe yê girtî Ş.K. bişopîne, hat Mêrdînê. H.K. a ji bo birayê xwe Ş.K. ê di ringê de bi nîşaneya serkeftinê destê xwe li ba kir rastî derp û gefên polîsên hêzên taybet hat.
‘EZ RASTÎ DERP Û HEQARETA POLÎSAN HATIM’
H.K. diyar kir ku polîsan ew derp kirin û wiha axivî: “Biraya min li Girtîgeha Tokatê girtiye. Gava birayê min di renga leşkerî de bû, min bi nîşaneya serketinê destê xwe li bak kir. Li ser vê yekê polîsê li ber deriyê ringê erkdar bû gazî min kir. Li vê derê nasnameya min ji min girtin. Dûre ez teslîmî polîsên hêzên taybet ên li ber deriyê otoparkê û di ketina derî de kirim. 4 polîsên hêzên taybet heqeret li min kirin. Ji carekê zêdetir li erzînka min xistin û ez derp kirim.”
‘GEFA KUŞTINÊ LI MIN XWARIN’
H.K. anî ziman ku polîsan berê lûleya çekê dan zikê wê û wiha got: “Polîsên dijûn ji min re kirin, gotin ‘Gelo van tiştekê pir baş kiriye, tu ji wan re destê xwe li ba dikî?’ Min jî li ser vê ji wan re got ‘Tu here vê ji wan bipirse. Ew tên darizandin. Tu nikarî vê pirsê ji min bipirsî.’ Dûre yek ji polîsan berê lûleya çekê da zikê min û got ‘Ma ez te bikujim?’ Bi vî awayî bi kuştin gef li min xwar. Min jî bersiva ‘Tu dikarî min bikujî. Ev peywira te ye. Dadgeha ya we ye, dewleta ya we ye û tu dikarî min bikûjî. Li vê derê hûn birayê min dadgeh dikin, gelo çima ji min pirs dikin?’ da. Dûre ez birim pişt maşîneya zirxî û polîsekê di hûndir de gefa ‘ez carek din te li van deran nebînim’ li min xwar.”
H.K. da zanîn ku ew ji gefên polîsan natirse ûwiha bi dawî kir: “Min birayê xwe baybay kir. Ev mafê min ê herî xwezayî ye. Ji ber ku em Kurdin rastî van bêmafî û bêhiqûqiyan tên. Em tu carî vê bêhiqûqiyê qebûl nakin. Ez derbarê bûyerê de, bi navbeynkariya parêzerê xwe serlêdana sûc bikim.”
MA / Sonya Bayik