Tecrîda li ser Rêberê PKK'ê Abdullah Ocalan her ku diçe giran dibe. Malbat, parêzer û gel tu agahiyê ji rewşa Ocalan nastînin. Bertek û nerazibûnên li dijî tecrîdê her ku diçe zêde dibe. Di 2009'an de ser banga Ocalan Koma Aştiyê ya ji 34 qasidê aştiyê pêk dihatin ji Qandîl û Mexmûrê hatin Tirkye. Dema Koma Aştiyê hat Tirkiye ji aliyê sed hezaran ve hatin pêşwazîkirin û di nava civakê de hêviyek mezin ava kirin. Piştre der barê wan de doz hatin vekirin û gelek ji wan rastî ceza hatin û hatin girtin. 4'emîn Dadgeha Cezayên Giran a Amedê li 10 endamên Koma Aştiye bi giştî 106 sal cezayê girtîgehê birî. Endamê Koma Aştiyê Lutfî Taş, li girtîgehê jiyana xwe ji dest da. Endamên komê Mustafa Ayhan, Huseyin Îpek û Nurettin Turgut jî piştî cezayê wan qediya di 16'ê Kanûna 2017’an de serbest hatin berdan. Endama Koma Aştiyê Elîf Uludag a 60 salî ku ji Qendîlê hat jî rastî 14 sal cezayê girtîgehê hatibû û hêj girtî ye. Uludag niha li Girtîgeha Jinan a Gebze girtî ye. 29 kes jî ji be helwesta dewletê ya li hemberî aştiyê dîsa vegeriyan qandîlê. 

 

Yek ji endamê Koma Aştiyê Nûrettîn Turgut e. Turgut ji Mexmûrê tev li komê bû û 4 meh berê serbest hat berdan. Berdevkê Koma Aştiyê ya Maxmurê Nurettin Turgut, bal kişand ser tecrîda li ser Rêberê PKK'ê Abdullah Ocalan û diyar kir ku tecrîda li Îmraliyê xistine meriyetê her ku diçe li hemû girtîgehan belav dibe. 

 

Turgut, anî ziman ku ew ji baweriya Ocalan a ji aştiyê gelek bawer in û wiha got: "Ji bo em bibin perçeyekî pêvajoya aştiyê em hatin Tirkiye. Pêdiviya Tirkiye ji aştiya civakî heye. Pirsgirêka kurd bi şer çareser nabe. Divê bi aştiyê çareser bibe. Em wateyek pir mezin li vê banga Ocalan bar dikin. Em wekî qasid û lêgerînerê aştiyê hatin Tirkiye û tekoşîna me ya ji bo vê yekê dê bidome. 

 

‘EM LI SER BANGA OCALAN HATIN'

 

Me bi dil û can ji aştiyê bawer kir û bi wê baweriyê em hatin Tirkiye. Niha jî ev baweriya me berdewam dike. Lê me dizanibû hişmendiyek dewletê ya sedsalan heye. Em dizanîbû zû bi zû aştiyê qebûl nake. Dîsa me bawer nekir ku Erdogan û AKP vê pêvajoyê erênî bi encam bike. Ne ji ber helwesta dewlet û Erdogan, ji ber banga Ocalan me hatin. Birêz Ocalan bi salan û bi dehan caran banga aştiyê dike. Ji vê yekê em helwesda dewlet û îktîdarê dizanin. Me dît ku disa dewlet bê samîmî nêzîk bû."  

 

‘ME DIZANÎBÛ EM DÊ BÊN GIRTIN'

 

Turgut, destnîşan kir ku wan girtigeh da ber çavên xwe û bi vê zanebûnê tev li koma aştiyê bûn û hatin Tirkiye û wiha berdewam kir: "Me zanîbû ku bi salan em dê li girtîgehê bên girtin. Di sala 95'an de ev yek wisa bû. Di sala 1999’an de Koma aştiyê hat dîsa endamên komê hatin girtin û li girtîgehê man. Niha HDP siyasetê dike. lê sibê çi bê pêş wan ne diyar e. Lê tevî her tiştî dîsa em dê li Tirkiye siyasetê berdewam bikin û ji bo çareseriya pirsgirêka kurd têkoşîn û berxwedana me dê berdewam bike. "

 

‘TECRÎDA LI ÎMRALIYÊ LI HEMÛ GIRTÎGEHAN BELAV DIBE'

 

Turgut, anî ziman ku tecrîda li Girtîgeha Îmraliyê li dijî Ocalan dest pê kir îro li hemû girtîgehên Tirkiye belav dibe û wiha lê zêde kir: "Li hemû girtîgehên Tirkiye û Kurdistanê tecrîd didome. Ger ku di destpêkê de hem welatparêzên kurd û hem welatparêzên tirk di wextê de bertek nîşanî tecrîda li ser Ocalan dabûna îro tecrîda li ser Ocalan ew qas giran nedibû. Dîsa tecrîda li Îmraliyê dest pê kir îro li hemû girtîgehan belav nedibû. Ger ku li herêmekê gelê wir faşîzmê nexwazin divê li dijî faşîzmê têbikoşin. Ger ku tênekoşin pergala faşîzmê dê li wir bi cih bibe û belav bibe. Bi berxwedanê ve gerêdayî ye. Ger ku berxwedan xurt be dê faşîzm pêş nekeve. lê ger ku berxwedan lawaz be dê pergala faşîzmê pêş bikeve. Niha dema em tecrîdê niqaş dikin em tenê tecrida li ser Îmraliyê niqaş nakin. Em tecrîda îro li ser gel tê meşandin jî niqaş dikin. Divê em îro li dijî hemû tecrîdê li ber xwe bidin. Ger ku em li dijî tecrîdê li ber xwe bidin em dê tecrîdê bi dawî bikin. Her tişt girêdayî têkoşînê ye. Em dê tekoşîna xwe berdewam bikin. Dema birêz Ocalan ji bo aştiyê bang li me kir rewş dizanibû û dizanîbû tabloyek çawa dê bê pêş wî. Li gel vê yekê dîsa banga koma aştiyê kir. Em ji hatina xwe tu car ne poşman in. Ji ber ku em dizanin aştî dê bi ser bikeve. Hem gelê kurd û hem jî gelê Tirk hewldanên me û Birêz Ocalan ên aştiyê dît. Nêzîkatiya dewletê ya li hemberî çareseriya pirsgirêka kurd dît. "

 

MA / Necda Demîr - Yasin Kobulan