Parêzera Rêberê PKK'ê Abdullah Ocalan Several Ballikaya, der barê tecrîda li ser Rêberê PKK'ê Abdullah Ocalan û pergala li Îmraliyê tê meşandin nirxandin kirin. Prz. Balikkaya bal kişand ser astengiyên li pêş heyeta îmraliyê, parêzeran û rapora CPT ya ku dereng hat parvekirin. 

 

‘TECRÎDA TECDÎDÊ YE' 

 

Ballikaya, anî ziman ku tecrîda li Îmraliyê niha di beriyetê de ye tecrîda di nava tecridê de ye û wiha got: “Ev tecrîd, tecrida li Tirkiye derbas kirye. Tecrîdek pir hişk e. Ji ber ku hemû mafê hevdîtina malbat, heyet û parêzeran a ji ser Birêz Ocalan hatiye qutkirin. Hemû mafê ragihandinê ji destê wî hatiye girtin. Ev pêkanîna ceza li gorî Girtîgehên Tîpa F yên din pir cuda ye. Li Girtîgehên Tîpên F yên heyî ev pêkanîn tune ye. Girtî ji xwe ji hemû mafê xwe yê ragihandinê bêpar tên hiştin. Lê li pergala Îmraliyê mafê ziyareta parêzer, malbat û heyetê tev hatiye asteng kirin. Ji 2011'an heta niha 7 salin parêzer nikarin biçin Îmraliyê. Ji 2015'an heta niha heyet nikarin biçin. Ji 2016'an heta niha jî malbat nikarin biçin Îmraliyê û nikarin bi Birêz Ocalan û girtiyên din re hevdîtin bikin. Ev tenê ji bo Girtîgeha Îmraliyê derbas dibe. Tu mînakê vê yekê li cîhanê tune ne. Hemû rê û derfetên ragihandinê li pergala Îmraliyê hatin qutkirin. Tecrîd di nava tecrîdê de ye." 

 

‘LI GORÎ HIQÛQA NAVNETEWEYÎ ÎŞKENCE YE' 

 

Prz. Ballikaya, anî ziman ku pergala tecrîda li Îmraliyê ne li gorî mevzuatên Tirkiye ne û ev pêkanîn li gorî mevzuatên navneteweyî işkence ye û wiha got: Ev kûral ji bo hemû girtiyan derbas dibe. Lê mixabin dadgehê hemû pîvan û hiqûq binpê kir û biryarek wisa stendiye. Li ser Birêz Ocalan tecrîdek girankirî heye. Li gorî hiqûqa navneteweyî îşkence ye. Divê mirovek bi tu awayî wisa neyê îzolekirin. Ev pêkanîn êdî li hemû girtîgehên din jî dikeve meriyetê. 

 

Rastkirina pîvan û kuralan li gorî pîvanên gerdûnî tên sazkirin. Li gorî pîvanên neteweyî piştî kes hikûm xwar, tenê ji azadiya xwe ya derve tê sînordarkirin. Lê ji mafê xwe yê din divê neyê sînordarkirin." 

 

Ballikaya, bal kişand ser rapora CPT û wiha got: "Rapora CPT kêm û dereng mayî ye. Rapora ku hat parvekirin her çend diyar bike ku li îmraliyê tecrîdek grankirî heye jî piştî lekolînê 2 sal şûnde aşkere kiriye. Piştî 2 sal şûnde tecrîd bêtir hatiye girankirin. Nirxandina CPT ya der barê vê yekê de tune. Rewşa OHAL'ê ya 2016'an venabêje. Rapora CPT beriya serdema OHAL'ê vedibêje. 

 

AŞKEREKIRINA RAPORÊ YA NIHA POLÎTÎK E 

 

Prz. Ballikaya, anî ziman ku CPT ji ber hin sedemên polîtîk niha rapor bi raya giştî re parve kir û wiha got: "Ji ber konjonkturên rojane ev rapor aşkere kirin. Bê guman fikar zêde dibin. Ji ber ku agahî ji Ocalan nayê girtin fikar zêde ne. Malbat u parêzer ne xwedî agahî ne. Dijî an najî agahî tune ye. Malbat, parêzer û hemû civak bi fikar in. Ji bo ev tecrîda giran bi dawî bibe divê parêzer û malbat demek berî demekê bi Ocalan re hevdîtin bikin. Divê tecrîda li Îmraliyê bi dawî bibe. Divê bi rêk û pêk agahî ji Îmraliyê bê girtin. Ev rewşa Îmraliyê û ya Birêz Ocalan nayê qebûl kirin. Divê parêzer û heyetek serbixwe bi Ocalan re hevditin bikin. Li gorî hiqûqa giştî mafê her kesî heye ku bi parêzerê xwe re hevdîtin bikin. Parêzerên ku bi Ocalan re hevditin dikir, parêzerên ku Ocalan bi xwe ew hilbijartibûn. Parêzer bi xwe diçûn Îmraliyê. Lê ger ku van parêzeran qebûl nekin û parezerên ku dewlet dixwaze tayîn bikin ev li dijî mafê parastina demokratîk û hiqûqê ye." 

 

'BILA GIRTÎGEHA ÎMRALIYÊ BÊ GIRTIN'

 

PRz. Ballikaya, herî dawî xwest Girtîgeha Îmraliyê bê girtin û wiha bi dawî kir: "Li hemû Girtîgehên Tipa F yên li Tirkiye tecrîdek mayînde heye. Lê tecrîda li Îmraliyê girantir û taybettir e. Bi taybeti piştî 20'ê tîrmehê polîtîkayek pir hişk li ser girtîgehan tê meşandin. Bi tevahî hiquqa şer tê meşandin û hemû zagon û hiqûq li dervê sînoran maye. Êdî hiqûq bê wate ye. Ev yek herî zêde li Îmraliyê pêtir derdikevin pêş. Ji bo pêşketina demokrasiyê divê berî her tiştî mafê mirovan bê pa rastin û pergala girtîgehan a li dijî mafê mirovan bê rastkirin. Divê dawî li pergala tecrîdê bê û Girtîgeha Îmraliyê bê girtin." 

 

MA / Necla Demir