Parêzer û hiqûqnasan, li ber Edliyeya Stenbolê ya Çaglayanê di hefteya 53'an de çalakiya Nobeta Edaletê berdewam kirin. Parêzeran di nobeta edaletê de bi minasebeta 5'ê Nîsanê Roja Parêzeran a Cîhanê peyama parêzerên girtî Akin Atalay, Ozlem Gumuştaş, Sezîn Uçar, Barkin Tîmtîk û Selçuk Kozagaçli xwendin. Parêzer li ber qada Atrium li pêş Peykerê Themis çalakiya rûniştinê pêk anîn û piştre li ber avahiya edliyê daxuyanî dan. Li ser navê parêzeran Endama Hewldana Welatiyan a Diyalogê Gençay Gursoy, Melda Onur, Ziya Halis, Akın Birdal, Levent Tuzel, Gulhan Ertur û endamê Koma Berê Demokrasî Îbrahim Kaboglu amade bûn. 

 

Li ser navê parêzeran Serokê Baroya Stenbolê Mehmet Durakoglu, bi minasebeta 5'e Nîsanê Roja Parêzeran axaftin kir û diyar kir ku 5'ê Nîsanê di heman demê de roja avakirina Baroya Amedê ye û 140’emîn salvegera Baroya Stenbolê piroz kir. Durakoglu, anî ziman ku hemû heq û hiqûqa parêzeran hatiye sînorkirin û mafê wan tê binpêkirin û wiha got: "Her dem me li dijî nehehiyan li ber xwe da û her dem dîrokê em mafdar dîtin. Me edalet teslîm nekir em teslîmî edaletê bûn. Parêzer ji têkoşîna demokratîk gav paşve navêtine û her dem ji bo serxwebûna hiqûqê têkoşiyane.Em dixwazin daraz serbixwe u bê alî be. Em dewleta hiqûqê dixwazin. Em gelê xwe jî li gel xwe dixwazin." 

 

 

Piştre parezerên girtî peyam şandin. Parêzer Selçuk Kozağaçli û Barkin Timtik di peyamên xwe de diyar kirin ku 5'ê Nîsanê pîroz dikin û hemû hempîşeyên xwe yên li eniya têkşîna parastina ked, edalet azadiyê cih digirin silav kirin. Parêzeran anîn ziman ku parêzerên li ber xwe didin dê rûmetê biparêzin û wiha gotin: "Roja parêzeran di heman demê de roja tekoşina parêzeran û roja parastina mafên parêzeran e. Parêzeran anîn ziman ku hem li derve û hem li hundir dê tekoşîna xwe berdewam bikin û dawi li saltanata vê zilmê bînin. "