COLEMÊRG – Serokomar Erdogan 3 meh berê dema Colemêrg ziyaret kir gotibû dê li Colemêrgê qedexeya li ser zozanan rakin. Lê qedexekirinên nû li ser qedexeyên kevn zêde bûn. Gundiyan Erdogan hişyar kirin û gotin: “Soza we girtiye, bicih bînin.”
Herî zêde di serdema AKP’ê de zozan, gelî û çolter di bin navê “Herêma Ewlehiya Taybet” de hatin qedexekirin. Pêkanîna qedexeya li ser zozanan û çolteran gelê herêmê bêzar dike. Serokê Giştî yê AKP’ê û Serokomar Recep Tayîp Erdogan dema beşdarî kongreya AKP’ê ya Colemêrgê bû, soza “Dê qedexeya li ser zozanan bê rakirin” dabû. Lê 3 meh di ser sozên Erdogan de derbas bûn, hem qedexe didome û hem jî qedexeyên nû li qedexeyên heyî zêde kirin.
Walîtiya Colemêrgê ji her 15 rojan carek gelek zozanan qedexe dike. Şêniyên Colemêrgê diyar kirin ku tekane debara wan li ser sewalvaniyê ye û bi hatina biharê re ew dixwazin derbikevin zozanan lê ji ber qedexeyan nikarin derbikevin. Colemêrgî dixwazin demil dest qedexe rabe û biçin zozanan.
HEKE ZOZAN RABIN DÊ ARAM BIBIN
Yek ji van gundiyên dixwazin biçin zozanan jî gundê Guncork a girêdayî navenda Colemêrgê ye. Şêniyên gund anîn ziman ku ewilî gundê wan ji 50 malan pêk dihat, lê ji ber qedexeyan gelek gundî koçberî bajaran kirin û dema qedexe rabe dê dîsa hemû gundî vegerin gund. Ji gundiyan Ekrem Kahraman destnîşan kir ku tekane debara wan li ser sewalan dibe û heke zozan û çol tune be dê nikaribin sewalkariyê bikin. Kahraman got: “Dema em nikarin derkevin zozanan, xwedîkirina sewalan gelek zehmet e. Liv ir zozanên me yên Gola Gewro, Çilkanî, Navxwarêzk, Berçelan û Qirnêse hene. Lê mixabin hemû qedexekirî ne. Heke qedexe rabe ne em û ne jî sewalên me do zehmetiyan nekişînin. Ji ber van qedexeyan gelek gundiyên me deriyên xwe qefle kirin û ji vir barkirin.”
‘DEBARA ME SEWLKARIYE’
Sevdîn Çîftçî yê ji heman gundî jî destnîşan kir ku kar û barê wan tenê sewlkarî ye û got: “Bi salan e em li vir sewalkariyê dikin, lê em dema herî xerab dijîn. Berê nêzî 6 hezar bizin û mihên me hebûn. Niha tenê em sê mal mane û ji her malbatê tenê 200 mihên me man e. Rizgariya vê herêmê û welat tenê sewlkarî ye. Ji bilî vî karî tu derfeta em debara xwe bikin nîne.”
‘BILA SEROKOMAR SOZA BIGIRE’
Jina bi navê Şîrîn Alpsar jî diyar kir ku bi salan e sewalan xwedî dike û xwest qedexeya li ser zozan û çola wan rabe. Alpsar wiha domand: “Sala par heta dawiya meha gulanê me nikaribû pezê xwe bidoşin. Çunkî cihê navbera sewal lêbûn û gund qedexekiribû. Ji ber vê yekê em nikaribûn biçûna cem sewalên xwe û bidoşin. Hemû riyên gund ji aliyê dewletê ve hatine girtin. Ev herêm hemû zozanên me ne, lê hemû niha qedexe ye. Erdogan got ku dê qedexeya li ser zozanan rabe. Em li bendê ne ku soza da bicih bîne.”
MA / Hamza Gunduz