ŞENGAL - Êzidiyên li Şengalê, diyar kirin ku Tirkiye PKK’ê weke hincet nîşan dide û gotin: “A rast Tirkiye dixwaze mîna Efrînê Şengalê jî dagir û talan bike.”
Hêzên HPG û YJA-Star, di 3’yê Tabaxa 2014’an de civaka Êzidî ji ferma DAIŞ’ê ya 74’emîn xelas kirin, piştî biryara vekişandina Koma Civakên Kurdistanê (KCK) ji Şengalê dest bi vekişandinê kirin. Hêzên gerîla yên ji bo Êzidiyên xwe spartin Çiyayê Şengalê bûn mertal, piştî yekîneyên parastinê yên gelê Êzidî hatin vakirin, vedigerin baregehên xwe. Tirkiye bi hinceta “Hebûna PKK’ê ya li Şengalê”, hewl dide êrîşî Şengalê bike û her roj gefan dixwe. Rêveberiya Bexdatê bertekek tund nîşanî vê helwesta Tirkiyeyê da û got: “Em ê li hemberî êrîşek biçûk a li ser yekbûyîna axa Iraqê re, bê bersiv nemînin.”
ARMANC JENOSÎT Û DAGIRKERIYE
Êzidiyên Şengalê helwesta Tirkiyeyê û paşvekişandina PKK’ê ya ji Şengalê ji Ajansa Mezopotamya (MA) re nixandin. Êzidiyan, diyar kirin ku ew êdî hem di warê leşkerî û hem jî di warê siyasî de dikarin xwe bi rêve bibin.
Êzidiyan, anîn ziman ku ji ber paşvekişandina PKK’iyan pir xemgînin û wiha axivîn: “Em ji komkujiyê xelas kirin. Em spasdarên wanin. Di binga gefên Tirkiyeyê de ne hêzên HPG û YAJ-Starê ne. Armanc dikin ku Şengalê dagir bikin û gelê Êzidî qetil bikin.”
‘JI SERDEMA OSMANIYAN DE REWŞ WIHAYE’
Endamê Xwesertiya Demokratîk a Şengalê Tîl Ezîrlî Elyas Qasim Çûkê, diyar kir ku gefên Erdogan ên li ser Şengalê ne nû ne û wiha axivî: “Destên Osmaniyên ecdadên Erdogan di 73 fermanên li dijî gelê Êzidiyan de hene. Ji ber vê yekê ev ji bo me ne nûye. Li Cizîra Botanê, ji bo hemû Kurdistaniyan ferman îlan kirin. Wan DAIŞ ava kir. Ji xwe cîhan hemû vê rastiyê dizanin.”
‘ÊDÎ EM DIKARIN ŞER BIKIN’
Qasim Çûkê, da zanîn ku Êzidî êdî ne Êzidiyên berene û wiha got: “Em ê li dijî êrîşan serî netewînin. Gefan li me dixwin, lê bila zanibin em ne ew Êzidiyên berî fermanê ne. Me dîroka xwe nas kir. Di warê siyasî û leşkerî de me rêxistinbûyîna xwe ava kir. Asta em şer bikin, me heye. Derdê Erdogan ne tenê Êzidîne, hemû kurdin.”
‘BI DERKETINA GERÎLA EM XEMGÎN DIBIN LÊ…’
Çûkê, anî ziman ku ew bi derketina gerîla xemgîn dibin û wiha bilêv kir: “Êdî ramanên Rêber Apo li ser axa Êzidiyan kok dane. Şervanên azadiyê li ku derê gelekê mezlum rastî êrîşan tê, dibezin hewara wan. Em jî fêrî vê yekê bûn. Ligel ku bi sedan leşker û pêşmerge hebûn jî, Êzidî helan û reviyan. Tenê şervanên azadiyê hatin hewara me û em parastin. Îro jî ji Şengalê vedikişin, lê ramanên wan dê bi me re bin. Her çiqasê bi çûyîna wan em xemgin dibin jî, lê ramanên Ocalan dê di Êzidxanê de bimînin.”
‘RAMANÊN WAN LI ŞENGALÊ ŞÎN BÛ’
Endama Meclîsa Jinan a Sînûnê Evîn Qasim jî, diyar kir ku bi gefên xwe armanc dikin ku gelê kurd tune bikin û wiha axivî: “Gava PKK hat ji kesekê destûr negirt, gava derbikeve jî ji kesekê destûrê nagire. Dibe ku paşve vekişin, lê raman, ruh û baweriya wan dê bi me re bimîne. Ramanên wan li her dera Şengalê şîn bû. Bi taybetî ji bo rêxistinbûyîna jinên Êzidî gelek ked dan û pêşengtî kirin. Em tim minetdarên wane.”
‘EM SOZA YEKÎTIYÊ DA WAN’
Endamê Komîteya Bawermendê Meclisa Sînûnê Salîm Sedûn Hesen jî, da zanîn ku rastiya Osmaniyan di bingeha gefên Tirkiyeyê yên li ser Şengalê de hene û wiha bilêv kir: “Cîhan li dijî van gefan bêdenge. Hêzên ji Şengalê vekişiyan, ji em xwestin ku em yekîtiya Êzidiyan ava bikin. Em jî soza yekîtiyê da wan.”
‘DIXWAZIN MÎNA EFRÎNÊ ŞENGALÊ JÎ DAGIR BIKIN’
Hevserokê Meclîsa Borîk Feysel Reşîd jî, dest nîşan kir ku ew girîngiyê nadin gefên Erdogan û wiha got: “Ji ber ku êdî leşkerên me yên şer bikin û rêxistinbûyan me heye. A rast dixwazin Şengalê jî mîna Efrînê dagir bikin. Bingeha hemû êrîşên li ser gelê Êzidî yên Şengalê dîrokîne. Hêzên gerîla ji bo gelê Êzidî ji komkujiyê rizgar bike hatin vê derê. Ji bo em xwe birêxistin bikin, alîkariyên mezin dan me. Ewê tim di dilê me de cih bigirin.”
MA / Selamî Aslan