ÊLIH – Li Heskîfa ku rûxandin lê didome, bêyî ku qada cihnişînê ya nû temam bûbe, ji esnafan tê xwestin ku dikanên xwe vala bikin. Xwediyên kargehan destnîşan kirin ku sozê hatine dayîn bi cih nayên.
Heskîfa xwedî dîrokeke 12 hezar salî ye û ji bo çêkirina Bendava Ilisûyê dibe qurban. Heskif, ji hêlekê ve tê rûxandin, ji hêlekê ve jî hin berên dîrokî bi rêbazên veguhastinê li quntarên Çiyayê Ramanê li cihê cihnişînê yên nû tên bicihkirin. Lê bêyî ku qada cihnişînê ya nû temam bûbe, ji xwediyên kargehan tê xwestin ku dikanên xwe vala bikin. Esnafan bi girtina derabeyan bertek nîşanî vê rewşê da. Esnafên ku meşa li dar xistin û bertek nîşanî rewşa heyî dan, polîsan mudaxileyî wan kiribû û ew derb kiribûn. Esnaf û şêniyên navçeyê destnîşan kirin ku ew hatine xapandin.
SOZÊN HATIN DAYÎN HATIN JIBÎRKIRIN
Keyayê Taxa Bahçelîevlerê Hasaan Yilmaz diyar kir ku dema diravdanên cemaweriyê hatin dayîn, soz dabûn ku heta qada cihnişînê ya nû neyê çêkirin û gel neyê veguhastin wê rûxandin dest pê neke, lê belê niha jî tê gotin ku divê di nav 15 rojan de dikan bên valakirin. Yilmaz bi lêv kir ku gelê navçeyê hatiye mexdûrkirin û got: “Dema mirov xaniyên xwe yên nû nestendibin, dema hûn malên wan birûxînin û ceryan û ava wan qut bikin helbet em ê jî dest bi liberxwedayînê bikin.”
Li gor Serokê Komeleya Çandê ya Heskîfê Ahmet Akdenîz jî ji ber ku qedandina projeye bi derengî ketiye gel tê mexdûrkirin.
PÊŞÎ BILA MALÊN ME TESLÎM BIKIN
Şêniyê navçeyê Mehmet Şîrîn Biçakçi jî destnîşan kir ku wan bi çalakiyên ku li dar dixin dixwazin dengê xwe ragihînin. Biçakçi bi lêv kir ku heta ku gel neçe qada cihnişînê ya nû, veguhastina dikanan ne rast e û got: “Hîn gel li vir e, tu radibû ji esnafan re dibêjî biçe. Li kuderê dinyayê tiştekî wisa heye. Evan kesan aqil xwarine. Pêşî bila malên gel teslîm bikin û paşê wê gel û esnaf tevde biçin.”
Biçakçi anî ziman ku ew nizanin qada cihnişînê ya nû di çi rewşê de ye. Biçakçi destnîşan kir ku ji ber teqemeniyên li Çiyayê Ramanê zarokên li dibistanên li herêmê bi talûkeyan re rû bi rû dimînin. Biçakçi got: “Her roj rojê çar sed pênc sed kilo teqemenî tên teqandin. Ev teqîn jî li cihekî nêzî dibistanên zarokên me tên teqandin. Dema teqîn çê dibin zarokên me dibêjin qey erdhej çê dibe.”
Esnafê navçeyê Omer Guzel jî, diyar kir ku ji bo pêdiviyên heskîfiyan b cih bên û esnaf neyên mexdûrkirin ew heta niha têdikoşin. Guzel destnîşan kir ku Heskîf veguherandine şantiyeyeke mezin û got: “Lin av taxan makîneyên karî yên mezin derbas dibin. Zarokên me diçin dibistanên li quntarên Çiyayê Ramanê û li wir her roj di wextê dersan de dînamît tên teqandin. Her woj di nav bajêr re makîneyên karî diçin û tên. Zarokên me bi rewşên talûke re rû bi rû ne. Dixwazin bi riya îcrayê dikanên me vala bikin. Herî kêm ji bo valakirina dikanan mehek lazim e. Heskîfî dibêjin heta ku qada cihnişînê ya nû temam nebe, ew ê necin. Ji me re dibêjin derkevin û ‘hûn diçin kuderê biçin, xwazî di konan de bijîn.’ Yek ji berpirisyarên sereke Miduriyeta Gişya ya DSÎ’yê ye. Dema em doza mafên xwe dikin, bi jop û gazê êrîşî me dikin.”