NAVENDA NÛÇEYAN - Bi deh hezarna welatiyên Rojava li Girê Spî, Serêkaniyê û Qamişlo meşên girseyî pêk anîn û şerê Tirkiye yê li ser gelê Efrînê şermezar kir.
Bi deh hezaran welatiyên Gire Spî, Serêkaniyê û Qamişlo li hev kom bûn û meşên girseyî pêk anî. Bi deh hezaran welatiyên meşiyan, êrîşên Tirkiye şermezar kirin û piştgirî dan gelê Efrinê.
GIRÊ SPÎ
Bi sedan ji pêkhateyên Girê Spî "Kurd, Ereb, Suryan, Turkmen" bi armanca destekdayîna Berxwedana Serdemê meşek lidar xistin û êrîşên Tirkiye yên li ser gelê Efrînê şermezar kir. Bi sedan şêniyên kantona Girê Spî li ber çerxeriya El-Elem a bajar kom bûn û bi dirûşmeyên "Bijî berxwedana Efrînê" dest bi meşê kirin. Meş li hemû kolanên sereke dewam kir û li çerxeriya El-Qefes veguhrî mîtîngê. Li vir piştî bîranîna cangoriyên azadiyê, Hevserokê Meclîsa Kantona Girê Spî Hemdan El-Ebd axivî û wiha got: "Dê dewleta Tirk a dagirker û çeteyên wê li hemberî Berxwedana Serdmê têk biçin. Cihê artêşa Tirk a dagirker û çeteyên wê li Bakurî Sûriyê tune ye û Îradeya gelê Sûriyê wê vê yekê tekez bike. Her çiqas dewleta Tirk a dagirker û çeteyên wê bi çekên giran êrîşî me bikin, lê nikarin îradeya me bişkînin û nikarin armancên xwe pêk bînin.”
Endama Kongreya Star Fadiya El-Şerîf jî wiha got “Şervanên me soza berxwedanê dane û wê heta dawiyê li hember êrîşên artêşa Tirk a dagirker û çeteyên wê parastina axa xwe bikin.”
Di dawiya mîtîngê de, helbestek bi zimanê kurdî derbarê silavkirina Berxwedana Serdemê ji aliyê welatiyê bi navê Îsmaîl Qewas ve hate xwendin.
SERÊKANIYÊ
Bi hezaran şêniyên bajarê Serêkaniyê jî bi heman armancê daketin qadan. Piştî êrîşên Tirkiye yên li ser Efrînê, bi hezaran welatiyên Serêkaniyê ji bo piştgiriya Berxwedana Serdemê û êrîşên Tirkiye şermezar bike daketin qadan. Girseya ku derketî qadan alên YPG/YPJ û wêneyên Rêberê PKK'ê Abdullah Ocalan bilid kirin û dirûşmeyên ʺBijî Berxwedana Efrînêʺ berz kirin û êrîşên Tirkiye şermezar kirin. Gel bi dirûşmeyên silavkirina Berxwedana Serdemê ji ber Meclîsa Mala Gel derket, li sûka bajêr geriya û heta qada Şehîdan meşiyan. Piştre meş veguherî mîtîngê. Piştî rêzgirtina ji bo kesên di têkoşînê de jiyana xwe ji dest dan, li ser navê Tevgera Civaka Demoqratîk TEV-DEM'ê Loqman Îsa axivî. Îsa diyar kir ku dijminê mirovahiyê dixwaze Efrînê dagir bike û wiha got: “Li hemberî wê jî gelê Efrînê berxwedaneke bêhempa nîşan dide. Çawa berî niha Serêkaniyê, Kobanê bi rihê berxwedanê bi ser ket, berxwedana Efrînê jî dê wisa bi ser bikeve.”
'ÊRÎYŞA WAN VÎNA GELÊ ME NIKARE BIŞKÎNE'
Li ser navê Kongreya Star Selwa Ehmed jî wiha qot: “Dewleta Tirk li ser gelê me yê Efrînê êrrîşen hovane pêk tîne. Em dibêjin ku êrîşên wan vîna gelê me naşkîne, îro li Efrînê dîroka birxwedanê tê nivîsandin. Bi vîna berxwedana gelê me dê Efrîn ji terora Erdogan re bibe gor. Em ji Erdogan re dibêjin Efrîn ne bi tenêye, em hemû Efrînin.”
Meş bi dirûşmêya “Efrîn wê biserbikeve û dê dagirkeriya Erdogan binkeve” bi dawîbû.
QAMIŞLO
Bi sedan şêniyên bajarê Qamişlo ji bo şermezarkirina êrîşên li dijî Efrînê li ber Komseriya Karûbarên Penaberan a Neteweyên Yekbûyî (UNHCR) kom bûn.
Girseya li ser banga serferberiyê û bi armanca şermezarkirina êrîşên Tirkiye yên li ser herêma Efrînê xwepêşandanek lidar xistin û li hemû kolanên bajar geriyan. Xwepêşandan herî dawî li ber Komseriya Karûbarên Penaberan a Neteweyên Yekbûyî rawestiyan. Gelê Qamişlo bêdengiya navdewletî û komkujiyên ku ji aliyê dewleta Tirk a dagirker ve li ser sivîlan pêk tê şermezar kirin. Berxwedana Serdemê di roja xwe ya 51`ê de bi hemû hêza xwe didome, lê heta niha tu rêxistinên mirovahî û DYA derbarî kuştina zarokan û koçberiya sivîlan bêdengin.