STENBOL - Endamê DÎB'ê Levent Tuzel û Hevseroka Giştî ya SYKP'ê Tulay Hatîmogullar, bertek nîşanê êrîşên 51 rojin li dijî Efrînê dewam dikin û bêdengiya hêzên navneteweyî dan. Tuzel ev tişt got: "Kesên mirîşkên wan tev li mirîşkên me dibin, îro wekî neyar hatine îlankirin û wan tune dikin."

 

Hêzên Çekdarên Tirk (TSK) û komên OSO'yê yên girêdayê wê, 51 rojin êrîşê Efrînê dikin. Piştî li dijî navenda bajêr êrîşa bombeyî pêk hat, bi sed hezaran kes bi komkujiyek mezin re rû bi rû nje. Ruxmê ku Neteweyên Yekbûyî (NY) agirbest îlan kir jî Tirkiye êrîşên xwe dewam dike. Endamê Yeklitiya Ji Bo Aştiyê (DÎB) Levent Tuzel êrîşên li dijî Efrînê nirxand.

 

TUZEL: LI HOLÊ JI DERVEYÊ MIRINAN TU TIŞT TUNE

 

Tuzel da zanîn ku êrîşên 51 rojin li dijî gelê Efrînê dewam dike, dê di navbera gelan de neyartiyê kûr bike û ev tişt got: "Ji ber polîtîkayeke xelet rewş hat vir. Em li dijî vê derketin û dê ev şer qutbûnên mezin di navbera gelan de çê bike. Ev mudaxaleya li dijî axa welatan e û em vê operasyonê rexne dikin. Di şerê 51 rojan de ji derveyê mirinan tu tişt derneket holê."

 

‘EM CÎRANÊN XWE WEKÎ DIJMIN ÎLAN DIKIN Û WAN TUNE DIKIN’

 

Tuzel nivîsa nivîskarê rojnameya Cumhuriyetê Aydin Engîn a wekî 'Ev pirsgirêk bi rêyên aştiyane bi rihetî dikare bê çareserkirin, lê dixwazin pirsgirêka kurd bi zora lûleya tifingê, hêza guleyê, şopa tangê, agirkirina roketê çareser bikin. Ev şer jî li axa welatekî din tê meşandin û Reîsê li ser dewletê rûniştiye, naveroka gotinê bi tevahî vala kir" jî bi bîr xist û ev tişt got: "Yanî diviya bû wan kesan wekî cîran îlan bikin û mirîşkên wan tev li mirîşkên me bin, îro wekî dijmin îlan kirine û dixwazin wan tune bikin. Ev bi tu awayî nayê qebûlkirin. Ji bo wê divê demek ji ya din zûtir van êrîşan bi dawî bikin."

 

‘DYA Û RÛSYA PÊŞEROGA GELÊN LI TIRKIYEYÊ TUNE DIKIN’

 

Piştî navenda Efrînê hat bombekirin, Tuzel bêdengiya hêzên navneteweyî rexne kir û ev tişt anî ziman: "Ji xwe herêm di bin dagirkeriya Amerîka û Rûsyayê de ye. Tirkiye jî li pey wê planê ye ji vê parekê bigire. Hin deman rê didinê, hin deman jî bi polîtîkayan didin derbaskirin. Yanî polîtîkaya ne diyar a ku bend di destê hêzên mezin de ne, gelek tev li hev e. Di vir de dozeke neteweyî û herêmî armanckirin, ne pêkan e. Amerîka û Rûsya dixwazin gelên herêmê ji hev de bixin." Tuzel aşkera kir ku yek rê heye ew jî yekitiya gelan e.

 

HATÎMOGULLARI: KETINA NAVENDA BAJÊR, DÊ KUŞTINA SIVÎLAN ZÊDE BIKE

 

Hevseroka Giştî ya Partiya Rizgariya Ji Nûve ya Sosyalîst (SYKP) Tulay Hatîmogullari jî destnîşan kir ku ew ji serî de van êrîşan şaş dibînin û wiha dirêjî da axaftina xwe: "Em êrîşa li dijî navenda Efrînê û kuştina sivîlan şermezar dikin. Roja ku li Sûriyeyê şer dest pê kir heta niha, Efrîn cihê herî bi ewle bû. Ji bo wê ji gelek deverên Sûriyeyê koçberî çêbû. Qasî milyonek mirov lê dijîn. Ruxmê vê jî ketina navenda bajêr dê mirinên sivîlan zêde bike."

 

‘HÊZÊN ROJAVAYÎ ÇAVÊN XWE JI MIRINAN RE DIGIRIN’

 

Hatîmogullari da zanîn ku divê Neteweyên Yekbûyî hêj bertekekî xurt dayne holê û wiha pê de çû: "Lê vê helwestê danayne holê. Ji xwe diyar e destê hêzên navneteweyî di plana li Sûriyeyê de heye. Ji bo wê qasî ku pêwîst dike, dengê xwe ji bo sivîlên li Efrînê tên qetilkirin re dernaxin. Di şertên asayî de, Ewropa li ber mirinan ew qas ne bêdeng e, lê niha qet deng nake. Neteweyên Yekbûyî li ser biryara xwe jî nasekine. Hêzên rojavayî çavên xwe ji mirinan re digirin." Hatîmogullari destnîşan kir ku berjewendiyên gelan, ne li gorî berjewendiyên hêzên emperyalin.