ÊLIH – Hevseroka berê ya HDP’ê Serpîl Kemalbay li Êlihê di mitînga 8’ê Adarê de axivî û got: “Dê jin rejîma yek zilamî hilweşînin. Pîlê AKP’ê xelas bû. Em ê ji têkoşîna xwe gavek jî paş ve neavêjin û teqez bi ser kevin.”
Li Êlihê jinan bi pêşengiya Meclîsa Jinan a HDP’ê ya Êlihê 8’ê Adarê Roja Jinan a Cîhanê li ber Stadyuma 16’ê Gulanê pîroz kirin. Xebata mitînga bi rojan berê ku hatibû kirin, jin serê sibê herikîn qadê. Ji heft salî heta heftê saliya jinan bi rengên cilên herêmî xemilandin. Qada mitîngê bi alên TJA, DBP û HDP’ê xemilandin. Hevseroka serdema beriya niha ya HDP’ê Serpîl Kemalbay, parlamenterên HDP’ê Ayşe Acar Başaran, Saadet Becereklî, Dayikên Aştiyê û bi sedan jin beşdar bûn. Jinan benavber dirûşmeyên "Jin jiyan azadî" û “Em ê bi berxwedanê serkevin” berz kirin û bernameyê bi rêzgirtinê dest pê kir. Koma Rosîda ya Navenda Çanda Bihar derket ser dikê û bi stranan jinan dilgeş kir. Jinan li kincên reng û reng ên gelerî li xwe kirin û li ber muzîkê govend gerandin.
'DÊ JIN AŞTIYÊ BIPARÊZ IN’
Ewil Parlamenter Saadet Becereklî axivî û behsa kuştinên jinan ên di serdema AKP’ê de kir û got ku dê jin parastina aştiyê dewam bikin.
Parlamenter Ayşe Acar Başaran jî axivî û da zanîn ku dê jin li dijî zilmê li berxwe bidin û dê jin zilm û zextan rawestînin.
'DÊ JIN REJÎMA YEK ZILAM HILWEŞÎNIN’
Hevseroka berê ya HDP’ê Serpîl Kemalbay jî axivî û destnîşan kir ku jin her ji bo hemû mafên jiyanê li ber xwe dide û got: “Jinên kurd bi salan li dijî zilmek dijwar li ber xwe dan û berxwedanê diyarî jinên kir kirin. Niha jî îro em bi kevneşopiya wê berxwedanê bi hev re gavên xwe diavêjin. HDP partiya jinan e. Heta ku jin hebin dê rejîma yek zilamî nikaribe hebûna xwe ava bike. Dê têkoşîna me hemûyan bi hev re pergal û rejîma yek zilamî hilweşîne. Dê jin destûr nedin qesrê ku me birêve bibe. Pîlên AKP’ê xelas bûn. Teqez dê jin bi ser kevin. Teqez wê demorkasî û aştî qezenc bike. Em ê ji têkoşîna xwe gavek jî paş ve neavêjin.”
Piştî axaftinan hunermend derketin ser dike û mitîng bi gerandina govendê bi dawî bû.