Şerê Hêzên Çekdar ên Tirk (TSK) û komên OSO yên di bin banê wê de li dijî Efrînê di roja 46’emîn de bi hemû dijwariya xwe dewam dike. Ji ber bombebarana hewayî û bejahiyê bi hezaran sivîl neçar man ku ji dehan gundan derkevin û ji ber ewlehiya can koçberî navenda bajêr kirin. Li gorî daneyên Nexweşxaneya Avrînê heta niha 216 sivîl jiyana xwe ji dest dan û 647 sivîl jî birîndar bûn. Rayedarên Neteweyên Yekbûyî kuştin û birîndarkirina sivîlan ji nedîtî ve tê û daxuyaniya “YPG derketina sivîlan a ji Efrînê asteng dike” dide. Ev îdiayên rayedarên NY li Efrînê rastî nerazîbûna welatiyan tê. 

 

‘DIVÊ NYE, PROPAGANDA ERDOGAN NEKE’ 

 

Osman Îsmaîl Mustafa yê ji gundê Kevirêker a girêdayî navçeya Raco beriya 20 rojan neçar ma ku biçe li Efrînê bicih bibe. Mustafa yê bi 17 ferdên malbata xwe re koçî Efrînê kir, li dijî îdiayên rayedarên NY’yê ev tişt got: “Em li vir in. NY, dest bi vegotina derewên Erdogan kiriye. Dibêjin ku YPG li Efrînê derketina sivîlan asteng dike. Berevajî van îdiayên wan ey rayedarno baş dizanibin, em ji naxwazin ji Efrînê derbikevin. Çima wê YPG me asteng bike. NY li gorî kêfa Erdona diaxive. Em li pişt zarokên xwe yên li eniyan şer dikine. Erdogan li me dide û malên me talan dike. Li me didan û me dikuştin. Em jî neçar man bên navenda Efrînê. Yê ku terorê ava dike û mezin dike ew e. Yê ku Sûriyeyê, Lîbyayê, Misirê û Tunusê xera kir Erdogan e. Niha jî bi NY’yê re di nav lîstikan de ye. Divê ku NY neyê ser xeta Erdogan û propaganda wî neke.” 

 

‘BÊBEXTIYÊ LI ZAROKÊN ME DIKIN’ 

 

Şaban Henan ê ji gundê Erendê ya bi ser navçeya Şiyê ve bi 30 xizmên xwe re koçî navenda Efrînê kir jî bersiv da rayedarên NY’yê û got: “YPG hêza ji gel pêk tê. YPG zarokên vî gelî ye. Niha kî li ser kî zordestiyê dike? 7 sal e çima NY li dijî kesên terorê li ser efrîniyên 7 sal in di nav aştiyê de dijîn deng dernaxe, lê bêbextiyê li zarokên me dikin.” 

 

'DAXWAZEK ME YA EM DERKEVIN ÇÊNEBÛYE’ 

 

Henan da zanîn ku li şûna NY li dijî komkujiya li Efrînê hesas tevbigere lê îdiayan diavêje holê û got: “Bi çekên kîmyewî êrîşî me dikin. Êrîşî Tirendêyê kirin. Bi vê boneyê em neçar man ji gundên xwe derbikevin. Nexwe em naxwazin bihostek axa xwe bidin. Lê moralê li cih e. Serê me bi QSD, YPG û YPJ’ê serbilind e. Ew hêza parastina me ne. Tu daxwazek me ya ji Efrînê em derkevin jî çênebûye. Tişta ku beriya vê mijarê bê nîqaşkirin heye, ew jî komkujiya li ser sivîlan e û dagirkirina Efrînê ye.” 

 

‘GEL DERNAKEVE LI BER XWE DIDE’ 

 

Mihemmed Cemîl ji ber êrîş, topbaran û bombebaran giran bi ferdê malbata xwe re neçar man ku biçin navenda Efrînê. Cemîl ew bi malbata xwe ya 15 kesan bûne mêvanên malbetekê û ev tişt anî ziman: “Sê top li mala me ketin. Hemû mala me hilweşiya. Em mirovên sivîl in. Zarokên me birîndar bûn. Ji ber vê yekê em neçar man bên navenda Efrînê. Em li vir mêvan in. Gelê me deriyên xwe li me vekiriye. Em gelek tengezariya dikişînin, lê dîsa jî tevahiya gel li ber xwe dide. Gel naxwaze ji Efrînê derbikeve. Berevajî vê yekê gel carek din vedigere cihên tên bombebarankirin.” 

 

MA / Selamî Aslan