EFRÎN – Şêniyên gundên li ser sînor ji ber êrîşên TSK’ê û komên OSO neçar man dev ji gundên xwe berdin û gotin ku ji ber êrîşan mal û milkê wan talan bûne.
Li gel biryara “agirbesta mirovî” ya Neteweyên Yekbûyî (NY), Hêzên Çekdar ên Tirk (TSK) û çekdarên komên OSO 39 roj in erîşî Efrînê dikin. Ji ber êrîşan heta niha bi dehan sivîl jiyana xwe ji dest dan. Şêniyên li ser sînorê Efrîn û Tirkiyeyê neçar min dev ji mal û milkên xwe berdin û biçin li bajar bicih bibin.
Şêniyên gundê Qûrnê û Dersêwan yên girêdayî navçeya Bilbilê ya Efrînê ji ber êrîşan neçar man xwe li gundê Naza ya Bilbilê bigirin. Şêniyên gund behsa talankirina TSK û OSO’yê kirin.
‘DÊ ZAR Û ZÊÇÊN ME QETIL BIKIRINA’
Mihemed Nurî ê 75 salî yê ji gundê Qurnê diyar kir ku ji rojên ewil a êrîşan li ser gundên wan pêk hat û ji ber ewlehiya wan tunebû neçar mane ku biçin gundê Naza. Nurî kelegirî behsa zilma li ser wan pêk hatiye kir û ev tişt got: “Bi topan êrîşê malên me kirin. Em neçar min biçin li gundê Naza ya 10 kîlo mîtro nêzî me bicih bibin. Çunkî ji bo jiyankirinê derfet nema. Me dikaribû xwe bigîhînin vir. Sivîlan qetil dikin. Heke em nehatina vir dê zar û zêçên me qetil bikirina. Piştî rojekê ji bo ez kelûpelên xwe bigirim çûm gund. Lê tiştek nemabû neanîbûn serê mal û milkên me. Ez bi talankirinê re hevrû mam.”
BI ROJAN E JI BIRAYÊ XWE BIRÎNDAR AGAHÎ NAGIRE
Nûrî anî ziman ku birayê wî Huseyîn Nurî yê 50 salî jî di dema êrîşan de ji sînga xwe birîndar dibe û dev ji gundê xwe bernade. Nurî destnîşan kir ku çekdarên TSK û OSO’yê birayê wî revandine û ji wê rojê ve agahî ji birayê xwe negirtiye û metrisin ku birayê wî hatibe îfazkirin.
Gundê Naza jî ku ji bo şêniyên gundên din bû wargeh, dîsa hedefa êrîşan de ye. Bênavber êrîş li ser gundê Naza jî pêk tên.
‘ŞERÊ TALAN Û DIZIYÊ YE’
Şêniyê gundê Dersêwan Mistefa Xelîl ê 38 salî jî da zanîn ku li gel ewqas êrîş dîsa xwe li vî gundî bi ewle hîs dikin û got: “Çekdarên TSK û OSO’yê talan û diziyê dikin. Mal û milkên gundê Dersêwanê talan kirine. Ev ne herbek e, pir vekirî ev şerê dizî û talangeriyê ye. Ev şer nakin komkujî û diziyê dikin. Hemû malan vala kirin. Bi kamyonan mal û milkên me birin Ezaz û Kilîsê. Êdî em li vir in. Em ê biçin k3u? Em ji wan natirsin.”
CARA DUYEM KOÇBER BÛN
Yek ji malbata ji gundê Dersêwanê koçî gundê Naza kir jî malbata Henan e. Malbata Henan, 3 sal berê niha ji Helebê reviyan û koçberî Efrînê bûn. Malbatek ji ferdan pêk tê. Ji ber êrîşên TSK û OSO neçar man ku cara duyemîn koç bikin. Îsmehan Henan ê 37 salî jî hinceta xwe ya koçberiyê wiha rave kir: “Em ji Helebê reviyan hatin vir. Niha li vir jî hemû tiştên me talan kirin. Sê malên me hebûn. Em malbatê di halê xwe de dijîn. Zarok ji dengê topan ditirsiyan. Em jî neçar man ku ji gund bar bikin. Mala birayê min li vir e. Em jî hatin li gel wan bicih bûn.”
‘KELÛPELÊN ME DIBIN LI TIRKIYEYÊ DIFIROŞIN’
Henan hêzên TSK û OSO’yê bi talangeriyê sûcdar kir û got: “Hemû kelûpelên me bi ser Ezaz û Kilîsê re dibin Tirkiyeyê û li wir difiroşin. Risqên zarokên me dizîn.”
MA / Nazim Daştan- Selamî Aslan