HATAY – Esnafên li Bûlwara Ugur Mumcu ya Hatayê ji ber şerê 7 sal in, li Sûriyeyê nikarin kar bikin û gotin ku ji b er xebata rê ya şaredariyê jî hatine asta topavêtinê.
Şaredariya CHP’ê ya Bajarê Mezin a Hatayê 2 sal berê niha li navenda bajêr li Meydana Ugur Mumcu dest bi projeya çêkirina derdorê kir. 2 sal bi ser projeyê re derbas bû lê hêj xelas nebûye. Hat zanîn ku di dema kolandinê de bermayiyên dîrokê derketine û proje dirêj bûye. Esnafan anî ziman ku 7 sal e ji ber şerê li Sûriyê êdî ew nikarin tu karekî bikin û bi xebata projeya şaredariyê re hatine asta topavêtinê.
'ROJ HEYE EZ BI 10 LÎREYA DIÇIM MALÊ’
Mehmet Harbeylîgolu yê li Meydanê karê lokantayê dike da zanîn ku 2 sal e projeya çêdikin xelas nebûye û got: “Ji ber vê projeyê em mexdûr bûn. Me tengasiya xwe ji walî û şaredariyê got lê kes guh neda me. Me got ji ber rewşa me ne baş e kredî ji me re derbixin wê jî nekirin. Rayedarek nehat negot esnaf rewşa we çawa ye? Niha ez nikarim deynê xwe yê kredî bidim. Li vir hin esnaf rewşa wan ji ya min jî xerabtir e. Roj heye ez bi 10 lîreyan diçim malê. Kes nikare kar bike. Di vir de ne mirov û ne jî wesayît derbas dibin. Vê xebata derdorê bandorê li ser me dike. Her kes di bin bandora şer de maye. Em di warê aborî de têkçûn.”
‘GELEK ESNAFAN DIKANÊN XWE GIRTIN’
Mahmut Çînler ê bi karê cam, PVC û deriyên pola debara xwe dike destnîşan kir ku ji ber xebata şaredariyê li ber topavêtinê ne û wiha got: “Jixwe ev 7 sal e şerek heye. Li ser vê yekê jî niha ev der hat girtin. Êdî mişteriyên me nayên. Nikarin wesayîtên xwe bînin park bikin. Li gel şertên şer jî niha vê xebata şaredariyê mexdûriyeta me mezin e. Gelek hevalên me esnaf ji ber vê rewşê kargehên xwe girtin. Em bi zorê li ser piya dimînin.”
MA/ Haci Yusuf Topaloglu