RIHA - 4'emîn danişîna doza Komkujiya Pirsûsê ya 33 kesan jiyana xwe ji dest da, dest pê kir. Berî danişîna dozê gaziya komkujiyê Tulîn Gun axivî û aşkera kir ku dema edalet bê Pirsûsê, dê bê hemû welat.
Di 20'ê Tîrmeha 2015'an de li ber Navenda Çanda Amarayê ya li navçeya Pirsûsa Rihayê, kesekî ku tê gotin endamê DAIŞ'ê ye xwe teqand, 33 kesan jiyana xwe ji dest da. 4'emîn doza ku der barê komujiyê hat vekirin, li 5'emîn Dadgeha Cezayê Giran a Rihayê dest pê kir. Danişîn li Kampusa Girtîgeha Tîpa T dest pê kir, kesên di êrîşê de bi birîndarî xilas bûn, endamên Însiyatîfa Malbatên Pirsûsê, Wekîla HDP'ê ya Rihayê Dîlek Ocalan, rêvberên HDP û DBP'ê tev li danişîna dozê bûn.
'FITÎLA ŞER LI PIRSÛSÊ PÊXISTIN'
Berî danişîna dozê gaziya Pirsûsê Tulîn Gun, ji ajansa me re axivî, da zanîn ku fitîla şer bi Komkujiya Pirsûsê re pêxistin, dema edalet bê Pirsûsê de edealet bê hemû welat û aştî bi pêş keve.
Gun diyar kir ku ew ji bo edaletê ketine rê û wiha axivî: "Me di serî de ji bo Pirsûsê edalet xwest, em ji bo her kesê edaletê dixwazin. Edalet bê Pirsûsê dê edalet bê Amedê, bê Enqereyê, bê Cizîrê û bê Sûrê. Bi komkujiya Pirsûsê re xwestin peyama 'Piştigiyê nedin Kobanê û gelê kurd.' Lê kesên xwestin komkujiyê bidin rawestandin, pireya piştgiriyê avaki kirin û ev bû hêzeke mezin. Emê ji bo Pirsûsê edaletê bînin. Emê girêdana xwe ya di navbera gelê kurd, Kobanê û Rojava de tu carî qut nekin."
‘ZEXTÊN DESTHILATDARIYÊ ME BÊZAR NAKIN’
Endamê Lijneya Rêveberiya Navendî ya Federasyona Komelyên Ciwanên Sosyalîst (SGDF) Denîz Bahçecî, destnîşan kir ku sedema bi israr û bi bawerî tin ewe, vê bêedaletiyê raxin ber çavê hemû cîhanê. Bahçecî bi lêv kir ku ew dixwazin zexta civakî derxin pêş û têkoşîna edaletê berfireh bikin.
Bahçeçî, wiha dirêjî da axaftina xwe: "Me heta niha dest ji edaletê berneda û emê bernedin. Her dema ku dozê şahidên Komkujiya Pirsûsê dest pê dike, xizmên kesên jiyana xwe ji dest dane tên binçavkirin û girtin. Ji bo pêşketina dozê asteng bikin, her cure zextan dikin. Ji roja destpêkê heta niha ev dewam dike û desthilatdarî nikare bi zextan me biçewisîne."
PIŞTÎ 18 MEHAN ÎDAINAME AMADE KIRIN
Di êrîşa li dijî endamên SGDF'ê de 33 ciwanan jiyana xwe ji dest dan. Piştî 18 mehan Serdozgerê Komarê yê Rihayê der barê bûyerê de îdianameya 213 rûpelî amade kir. 3 kesên wekî endamên DAIŞ'ê tên nîşandan, der barê wan de 104 caran cezayê heta hetayê tê xwestin.