5'emîn danişîna doza 12 parêzerên endamê Platforma Hiqûqnasên Azadîxwaz (OHP) û 38 endam û rêveberên Federasyona Komeleyên Piştgiriya Hiqûqî ya Malbatên Girtî û Hikumxwaran (TUHAD-FED), li 14'emîn Dadgeha Cezayê Giran a Stenbolê hat dîtin. Di danişîna dozê de kesên tên darizandin û gelek parêzer amade bûn. Ji Swêd, Fransa û Hollandayê û ji gelek baroyên welatan hatin doz şopand. Dozê bi parastina rêveberê TUHAD-FED'ê Recep Benek dest pê kir. Benek sûcdarî qebûl nekir, der barê xebatên TUHAD-FED'ê de agahî da. Rêveberê TUHAD-FED'ê Ahmet Dursun ê ji dozeke din girtî ye jî, bi rêya SEGBÎS'ê îfade da.

 

'EM ŞAHIDÊ SÛCÊ MIROVAHIYÊ NE'

 

Parêzer Tamer Dogan ê tê darizandin got ku heke mirov bersivê bide sûcdariyên wiha, wekî ku mirov kirasê dînan ê hatiye fesilandin li xwe kiribe û wiha axivî: "38 tapeyên telefonan ên der barê me de xistine dosyayê. Ez di çalakiyên Geziyê de razam. Tapeyên dema berxwedana Geziyê. Min li vir dît ka polîs çawa mirovan dikujin. Ji bo piştgiriya şoreşgerî, şikandina tecrîdê min serdana girtîgehê kir."

 

Dogan der barê parvekirinên li ser medyaya civakî de jî ev tişt got: "Di bin parvekirinên min ên medyaya civakî de bi sedan gef û çêr hene. Der barê van de yek lêpirsîn nehatiye vekirin? 6 hezar kes bi fermana Qesrê dixebite. Ji ber ku hiqûq wekî hevîrê pêlîstokê tê xebitandin, em parastineke wiha dikin. Divê hiqûq wekî hevîrê lîstokê nebe. Der barê Sûr, Cizîr, Kobanê û Efrînê de parvekirinên min hene. Em wekî heyet çûn Cizîrê. Tişta ewil min dît kuştina kalê 70'ê salî bû. Li gorî dewletê kê qêrîna Cizîrê bibihîse ev propagandaya rêxistinê ye. Ez şahidê herî nêz yê sûcê mirovahiyê me. Hûn dikarin ceza jî bidin ne pirsgirêke. Ew endamên OSO, El-Nusra û DAIŞ'ê yên li Efrînê wekî Kuvvayî Milliye îlankirine, me li kuçeyên vî welatî dît, li Cizîr û Sûrê dît. We endamên MÎT'ê yên di desê PKK'ê de dît. Têkiliyên xwe yên bi DAIŞ û komên cîhadî yên din re vegot. Divê êdî dewlet hişê xwe bide serê xwe. Ez elewî me. Ne ku ez ditirsim. Lê dema ev çete vegerin dê xwîna me birijînin."

 

'JI BER KU ME GOT HACI LOKMAN BÎRLÎK EN TÊN DARIZANDIN'

 

Dogan bal kişand ser parvekirinên xwe yên der barê Hacî Lokman Bîrlîk ê li Cizîrê li pey parnzerê kaşkiribûn de jî agahî da û wiha dirêjî da axaftina xwe: "Ev can û cîgerên me ne. Ez nikarim cenazeyê hevjîna xwe ya berê bigirim. Haci Lokman Bîrlîk bi birîndarî girtin, li pey maşîneya zirxî kaşkirin û ew kuştin. Ji bo bersûcan gotin 'Ew kesên di maşîneya zirxî de Fethullahî ne' ji peywirê girtin, lê ji ber ku me got Haci Lokman Bîrlîk em tên darizandin."

 

Parêzer Ayşe Gosterîşlîoglu jî sûcdariyên der barê xwe de qebûl nekir. Sînan Zîncîr ê tê darizandin jî  got: "Li vir nasnameya muxalîf a her du saziyan tê darizandin.” 

 

Piştî parêzaeran daxwazên xwe anîn ziman, meqamê îdiayê, heyeta dadgehê mutalaya xwe pêşkêş kir û xwest kêmasiyên dosyayê bên temamkirin. Piştî navberek kin heyeta dadgehê doz taloqî 10'ê Gulanê kir.