AMED – Endamê KCD'ê Dr. Mehmet Demîr, diyar kir ku biryara Parlamentoya Herêma Kurdistana Federe şoreşek e û xwest her kes li gorî biryare ji bo Kongreya Neteweya Kurd kom bibin.
Parlamentoya Herêma Kurdistana Federe di 31'ê Çile de ji bo Efrînê kom bû û xwest Kongreya Neteweya Kurd kom bibe. Parlamentoyê êrîşa li ser Efrinê jî şermezar kiribû. Endamê Kongreya Civaka Demokratîk (KCD) Dr Mehmet Demîr ê beşdarî Civîna Amedê ya ji bo Yekîtiya Neteweya Kurd bû, diyar kir ku biryarek dîrokî û di asta şoreşê de ye.
Demîr, ani ziman ku di serdema êrîşa li ser Efrînê berdewam dikir de parlamento kom bûye û biryarek wisa daye û wiha got: "Divê her kes li van biryaran xwedî derkevin. Biryara parlamentoya Kurdistanê girt di asta şoreşê de ye. Divê em vê biryarê tenê li ser kaxizê nehêlin û têxin meriyetê. Çawa em bi ruhê neteweyi li Kobanê xwedî derketin divê em bi ruhê neteweyî li Efrînê jî xwedî derkevin. Di serdemek wisa de gelek kar dikeve ser milê parlamentoya Kurdistanê. Ez hêvî dikim ku Birêz Mesud Barzanî jî piştgiriyê bide vê biryarê."
‘DIVÊ KONGRE ZÛ KOM BIBE'
Demîr xwest di serdemek wisa de kongre zû kom bibe û wiha berdewam kir: "Nivê nûnerên kurd ên li çar perçeyan ji bo neteweya yekîtiya kurd kom bibin. Divê em lez bidin xebatên xwe yên yekîtiyê. Di demek nêzîk de kongreya yekîtiya neteweyî pêk bînin. Îro li ser Efrînê bombe tên barandin. Cîhan hemû ê yekê temaşe dike. Lê em kurd dikarin şer rawestînin. Ji 7 salî heta 70 salî kurd dizanin ji ber kurd nebûne yek û yekîtiya kurdan nehatiye avakirin îro ev tişt tê serê wan. Ji ber ku yekîtî pêk nehatiye îro li ser me êrîş hene."
Demîr, destnîşan kir ku kurd di dîrokê de her dem rastî komkujiyan hatine û wiha got: "Îro Erdogan dixwaze dîsa vegere gotina “Kizil Elma" (Sêva Sor). Polîtîkayên ku komkujiyê li ser Kurdan pêş dixe esas digire."
‘BIRÊZ OCALAN BI ISRAR LI SER YEKÎTIYÊ RAWESTIYA'
Demîr, bal kişand ser israra Rêberê PKK'ê Abdullah Ocalan a yekîtiya neteweya kurd û wiha lê zêde kir: "Birêz Ocalan bi taybetî ij 2005’an heta 2013'an bi israr li ser yekitiya neteweya kurd rawestiya. Birêz Ocalan got hemû destkeftiyên kurdan girêdayî yekîti û tifaqa wan e. Di serdema şerê li Rojava de jî got 'Ger Kurd bibin yek dê li Rojhilata Navîn bibin hêz. Ji ber vê yekê îro yekîtiya kurdan pir ferz e. Divê kurd bi lez yekîtiya xwe ava bikin. Kurd îro ji her demê bêtir nêzî serkeftinê ne. Ewil êrîşî Şengalê kirin. Piştre êrîşî Kerkukê û îro jî êrîşî Efrinê dikin. Kurd îro bibin yek dê bibin hêz û bi ser bikevin. Lê ger ku nebin yek dê têk biçin."