Parlamenterê Partiya Demokratîk a Gelan (HDP) ê Şirnexê Faysal Sariyildiz ê wekîliya wî hat betalkirin, ev demeke xebatên xwe yên siyasî li Ewropayê dide meşandin. Sariyildiz êrîşên li ser Efrînê ji Ajansa Mezopotamyayê (MA) re nirxand.  

 

‘PÊŞIYA ERDOGAN VEBÛ’ 

 

Sariyildiz êrîşên li dijî Efrînê wek “hewldana dagirkirinê” bi nav kir û got: “Êrîş bi erêkirina hêzên kurewî pêk tê û du sedemên vê yên cuda hene. Yek ji van parçekirin û darbekirina rêxistina demokratîk a siyasî ye. Armanca din jî ew e ku pergala Erdogan hêdî hêdî ji bo cîhane dibe tehdît û vê yekê sînor bike û dûbare hilde bin kontrola xwe.” 

 

Sariyildiz da zanîn ku pergala cîhanê Tirkiyeyê dibe ser Efrînê û wiha dewam kir: “Pergala cîhanê Erdogan dixe nav çiravê. Ez difikirim ku hem dewleta Erdogan û hem jî siyaseta kurdan li gorî xwe terbiye dikin û li ser vê tev digerin. Mirov dikare wek operasyoneka cîhanî jî bixwîne. Bi vî awayî pêşiya Erdogan jî vebû. Pergala cîhanê Erdogan teşwîqî çiravê dike. Li aliyê din jî planên global pêk tîne û li pey mudaxelekirina krîzê ye.” 

 

‘OSO LI BER XWE NEDA, PÊVAJOYÊ BI BERXWEDANA GELÊ KURD DEST PÊ KIR’ 

 

Sariyildiz bi bîr xist ku ji roja destpêkê ya şerê Sûriyê rêxistinên kurdan nehatin dîtin û piştî kurdan li ber xwe da li Sûriyeyê bûn hêza diyarker. 

 

Sariyildiz wiha got: “Di salên ewil ê şerê li Sûriyeyê de hesab li ser OSO û rêxistinên wek wê didan meşandin. Lê wan tu hebûna xwe nîşan neda. Piştî demek hat dîtin ku hêza DAIŞ’ê ji kontrolê derket. Ewil ji bo hin mudaxeleyan DAIŞ’ê hêza xwe ya bi sînorkirî wek derfetên mudaxeleyê dît. Lê piştî demek şûn de hat dîtin ku DAIŞ wek hêzek cidî hat dîtin. Çimkî nîvê Sûriyeyê bi dest xistibû. Ji bo cîhanê jî tehdîtek mezin derxist holê û cîhan li hember vê ket nav fikaran. OSO li hember vê li ber xwe neda. Pêvajoya li Kobaniyê bi berxwedana şervanên bi rûmet ên kurd dest pê kir. Di vî warî de DYA û hêzên wek wan kurd wek hevkariyek îdeal hatin dîtin." 

 

Sariyildiz helwesta hêzên navnetewî ya der barê êrîşên li hemberî Efrînê jî nirxand. 

 

‘EWROPA JI BO BERJEWENDIYÊN XWE NAXWEZE TIRKIYE BIKEVE KRÎZÊ’ 

 

Sariyildiz bal kişand ser bêdengiya Ewropayê ya ji bo Efrînê û got: “Ewropa ji bo berjwendiyên xwe girîngiyê dide mijaran. Welatên Ewropa ji ber bi milyaran deynê wan li Tirkiyeyê ye, naxwazin ku Tirkiye bikeve nav krîzê. Ji ber vî awayî jî carna wek Erdogan dibin dîktator û dengê xwe dernaxin.” 

 

‘DIBE ZEXT PÊVAJOYÊ BIGUHERÎNIN’ 

 

Sariyildiz destnîşan kir ku li gel vê yekê îro tevahiya gelê kurd li welatên Ewropa rabûye ser piyan û wiha lê zêde kir: “Kolanên Ewropa ji pêvajoya berxwedana Kobanê bihûriye. Li seranserî Ewropayê hêrsa kurdan û dostên wan serdest e. Di pêvajoya Kobanê de jî wisa bûbû. Di wê pêvajoyê de cîhan li hember dagirkirina Kobaniyê bêdeng mabû. Lê piştî demekê şûn ve li ser zextên gelê me yê li Ewropa nêrîna hêzên navnetewî guherandin. Dibe ku ev di pêvajoya Efrînê de jî wiha bibe.” 

 

‘WÊ DEMÊ DAIŞ BÛ NIHA JÎ TIRKIYE’ 

 

Sariyildiz bal kişand ser êrîşên DAIŞ’ê û Tirkiyeyê û wiha dirêjî da axaftina xwe: “Dûh li Kobaniyê êrîşên çeteyan hebûn. Niha jî êrîşên dewletekê hene. Rê û rêbaza şerê li dijî Efrînê dagirkerî ye. Îro li Efrînê sûcê şer tê birêvebirin. Li wir hewldana dagirkirina bajêr heye.” 

 

Sariyildiz anî ziman ku Neteweyên Yekbûyî (NY) rêgezan bin pê kiriye û dê hêrsa gelê kurd a li Ewropayê wek pêvajoya Kobanê dê Tirkiyeyê bixe nav rewşek zor. 

 

‘DÊ ERDOGAN BIKEVE’ 

 

Sariyildiz di berdewamiya niraxandina xwe de wiha got: “Serkeftina Efrînê dê bibe sedemê pêngavên şoreşgerî ya li Bakurê Kurdîstanê jî. Çimkî Tirkiye tişta dixwaze li Efrînê bike dê pêk neyne. Erdogan û dewleta xwe nikarin li Efrînê tiştekî bi dest bixin û dê mehkûmî çûyînê bibin. Wê hemû dînamîk û bendên (klîkên) din fatûreyê bidin ser pişta Erdogan û dê Erdogan daxînin. Sedemê êrîşkariya ew qas dijwar a Erdogan jî ev e. Niha li Tirkiyeyê ser hişmendiyê hatiye girtin. Aqil cemidiye.” 

 

‘ERDOGAN HEVKARÊ DAIŞ’Ê YE’ 

 

Sariyildiz Serokomar Recep Tayîp Erdogan wek “Hevkarê DAIŞ’ê” pênase kir û got: “Tevgerîna demên dawî yên Erdogan yên dagirkeriyê ne. Ji bo Tirkiyeyê dîzayn bike ji DAIŞ’ê destek digire û rêbazê wan bi kar tîne. Lewma divê mirov têgeha hevkarê DAIŞ’ê ji bo Erdogan bi kar bîne.” 

 

MA / Selman Guzelyuz