'Di sala 10'emîn de li ser şopa Pirsûsê': Ji bo edaletê têkoşîna li ser bingeheke yekgirtî

2025-07-11 09:29:15


	STENBOL - Hevseroka SGDF'ê Berfîn Polatê diyar kir ku ew di 10'emîn salvegera Komkujiya Pirsûsê de têkoşîna xwe ya ji bo edaletê didomînin û got ku divê lêgerîna edaletê li ser bingeheke yekgirtî be. 

	Bi nêzîkbûna 10'emîn salvegera Komkujiya Pirsûsê, rêxistinên ciwanan bi dirûşmeya "Ciwan di 10'emîn salê de li ser şopa Pirsûsê li ser pêya ne" xebatên xwe didomînin. Di çarçoveya vê înîsiyatîfê de, kesên ku li Pirsûsê jiyana xwe ji dest dane dê bi rêzeçalakiyan werin bîranîn. Înîsiyatîfa Malbatên Pirsûsê dê di 17'ê Tîrmehê de saet di 7:30'an de li Hêwana Dawetê ya Labella ya li Okmeydani ya Stenbolê şeveke bîranînê li dar bixe. Serdanên goran jî dê di 20'ê Tîrmehê de saet di 11:50an de, li cihê komkujiyê pêk werin. Piştî bîranîna Pirsûsê ku her 20'ê Tîrmehê saet di 6:00'an de li Kolana Haliîtaga ya li Kadikoyê tê lidarxistin, rêxistinên ciwanan dê saet di 7:00'an de li Operaya Sureyya çalakiyekê li dar bixin.

	 

	Hevseroka Federasyona Komeleyên Ciwanên Sosyalîst (SGDF) Berfîn Polatê ji Ajansa Mezopotamyayê (MA) re li ser têkoşîna wan a ji bo edaletê axivî.

	 

	‘KESÊN JI BO PIRSÛSÊ DOZA EDALETÊ DIKIN TÊN GIRTIN'

	 

	Berfîn Polatê armanca çûna xwe ya Kobanî a berî 10 salan rave kir û got ku armanca dewletê bi komkujiyê ne tenê tunekirina fizîkî bû, lê di heman demê de destpêkirina "Plana Hilweşînê" jî bû da ku serdemeke nû bide destpêkirin. Berfîn Polatê got: "Îdiayek hebû ku zarokên Geziyê û zarokên Kobanî bînin cem hev û bibin bingeha şoreşeke yekgirtî. Bi vê komkujiyê re, xwestin vê xewnê hilweşînin. Dewletê hem ji ciwanan, hem ji hemû beşên civakê û hem jî ji sosyalîstan re got, 'Hûn nikarin xewnan bibînin, hûn nikarin bigihên şoreşê,' û ev yek, bê bêedaletiyan hat domandin. Di cih de piştî komkujiyê, fermanek veşartî hebû, hewl dihat dayîn ku delîl werin tepeserkirin, kursiyên bersûcan vala man, parêzer, malbat û kesên ku doza edaletê kirin delîl pêşkêşî dadgehan kirin û kesên ku li edaletê digerin bangên xwe li kolanan zêde kirin. Malbatên me ji ber ku ji kujer re gotin kujer tên darizandin; malbatên me yên Pirsûsê, birîndarên me, yên ku ji bo Pirsûsê edaletê dixwazin her sal tên girtin, binçavkirin û îşkencekirin, lê endamên DAIŞ'ê yên ku bi bultenên sor li wan tê gerîn li nexweşxaneyên dewletê yên Tirkiyeyê tên dermankirin. Ev bûyer nayên ronîkirin û sûcdar nayên darizandin. Wê demê digotin, 'Îstîxbarata êrişkarekî xwekuj heye, lê em nikarin mudaxele bikin heya ku ew xwe neteqîne.' Ev îspat dike ku ev komkujî ne tenê ji hêla DAIŞ'ê ve hatiye kirin."

	 

	‘JI BO PIRSÛSÊ EDALET JI BO HER KESÎ EDALET'

	 

	Berfîn Polatê bi bîr xist ku tevgera ciwanan ev komkujî wekî komkujiyeke ku wan hedef digire şîrove kiriye û kampanyayeke edaletê bi dirûşmeya "Ji bo Pirsûsê edalet, ji bo her kesî edalet" tê meşandin û got: "Dema ku em nêzî salvegera 10'emîn dibin, em xala herî girîng wekî bîrê şîrove dikin. Komkujiyek çêbû, sûcdarên vê komkujiyê hîn nehatine darizandin û hewl didin ku wê bidin jibîrkirin. Ne tenê dixwazin qetilkirin 33 rêwiyên bidin jibîrkirin; ew komkujiyek bû ku têkoşîna hevpar, şoreşa yekgirtî ya gelên Tirkiye û Kurdistanê hedef digirt. Em dibêjin ku ew îdîa, ew xewn, îro jî girîng in. Ji ber vê yekê, wekî rêxistinên ciwanan, em îsal dibêjin, 'Ciwan di sala 10'emîn de li ser şopa Pirsûsê  li ser pêyan e.' Em îsal bi taybetî bi rêxistinên ciwanan re xwe rêxistin dikin û dibêjin, 'Ciwanên ku wan barîkatên li Meydana Beyazitê şikandin û di serhildana ku di pêvajoya 19'ê Adarê de derket holê de rêyeke nû vekirin, divê niha vê serhildanê bi têkoşîna Pirsûsê ve bigihînin hev." 

	 

	Berfîn Polatê destnîşan kir ku gelek beşên civakê li edaletê digerin û wiha domand: "Li van axan ewqas neheqî diqewimin ku em bawer dikin ku ev lêgerîna edaletê tenê dema ku li ser bingeheke yekgirtî were cem hev dikare were pêkanîn. Em bang li hemû jin, ciwanan û kesên ku li edaletê digerin dikin ku bi hev re têkoşîna edaletê bidin ser milê xwe."

	 

	MA / Yeşîm Tukel