NAVENDA NÛÇEYAN - ÎHD û xizmên girtiyan, li Enqere û Stenbolê, daxwaz kirin ku Salîh Gun û Delal Tekdemîr demildest werin berdan.

 

Parêzvanên mafên mirovan li Enqere û Stenbolê ji bo balê bikişînin ser rewşa girtiyên nexweş, li hev kom bûn. Di çalakiyan de li ser ser rewşa girtiyên nexweş Salih Gun û Delal Tekdemîrê hat sekinandin û daxwaza serbestberdana wan hat kirin.

 

ENQERE

 

Înîsiyatîfa Azadî Ji Girtiyên Nexweş ji bo hefteya 586'emîn a çalakiya xwe li Qada Sakaryayê kom bû ku bal kişand ser rewşa girtiyên nexweş.

 

Di çalakiyê de rewşa Salih Gun ku li Girtîgeha Girtî ya Ewlekariya Bilind a Hejmar 2 ya Sîncanê girtî ye, hat destnîşankirin û dirûşmeyên wekî "Girtiyên nexweş berdin" û "Tecrîd îşkence ye, tecrîdê bi dawî bikin" hatin berzkirin.

 

Daxuyanî ji aliyê Hevserokê Şaxa Komeleya Mafên Mirovan (ÎHD) a Enqere Omer Farûk Yazmaci ve hat xwendin. Yazmaci destnîşan kir ku Salih Gun ji ber astengkirina xwegihandina dermankirinê rewşa wî her diçe xirabtir dibe û bal kişand ser nexweşînên wî yên wekî dil, tansiyon, fitiqê û nexweşînên kronîk. 

 

Yazmaci da zanîn ku her xwe nexweşîna kronîk otît jî bi Salih Gun re heye û ji sedî 72 nabihîse. Yazmaci got: "Xwegihandina mafê tenduristiyê ya Salih Gun bi awayekî sîstematîk tê astengkirin."  Yazmaci xwest ku der barê van binpêkirinan de lêkolîn bê kirin û Salih Gun demildest bê berdan. 

 

STENBOL

 

Komîsyona Girtîgehan a Şaxa Komeleya Mafên Mirovan (ÎHD) a Stenbolê 714'emîn çalakiya "Rûniştina F" li ber avahiya komeleyê ya li Beyoglûyê li dar xist. Gelek parêzvanên mafên mirovan beşdarî çalakiyê bûn. Di çalakiya vê hefteyê de li ser rewşa girtiya nexweş Delal Tekdemîrê (68) hat sekinandin. 

 

Parêzvanên mafên mirovan, wêneyên girtiyên nexweş hilgirtin û pankartên bi nivîsên "Girtiya nexweş Delal Tekdemîrê berdin" û "Tecrîd dikuje, hevgirtin jiyan e" vekirin. Di çalakiyê de gelek caran dirûşmeyên wekî "Girtiyên nexweş berdin", "Delal Tekdemîrê berdin", "Dermankirin maf e, nayê astengkirin" û "Mirov bi mafên xwe mirov in" hatin berzkirin. 

 

Metna daxuyaniyê ji aliyê Endamê Komîsyona Girtîgehan a Şaxa ÎHD a Stenbolê Mehmet Acettîn ve hat xwendin. Acettîn bal kişand ser 11'emîn Pakêta Darazê û got ku çendî girtiyên nexweş bi mirinê re rû bi rû ne jî rewşa wan di vê pakêta darazê de cih negirtiye. 

 

Acettîn îşaret bi nexweşînên girtiya nexweş Delal Tekdemîrê ya di Girtîgeha Jinan a Bakirkoyê de kir û got ku guatr, helandina hestiyan bi Delal Tekdemîrê re hene û ligel vê ji ber kirêca di lingên wê de bijîkan gotiye divê demildest bê emeliyatkirin. 

 

Acettîn da zanîn ku çendî 6 sal û 10 meh û 15 roj cezayê li Delal Tekdemîrê hatiye birin di 23'yê Hezîrana 2025'an de temam bûye jî nayê berdan. Acettîîn xwest ku Delal Tekdemir a astengdar demildest bê berdan û banga hestiyariyê kir.