Tirkiye û koma paramîlîter a girêdayî wê ya bi navê Artêşa Neteweyî ya Sûriyeyê (ANS) êrişên xwe yên li ser Bakur û Rojhilatê Sûriyeyê didomînin. Di van êrişan de jin û zarok jî di nav de 52 sivîl jiyana xwe ji dest dane û 28 sivîl jî birîndar bûne. Nûnerên partî û saziyan diyar kirin ku êrişên li ser Bakur û Rojhilatê Sûriyeyê destkeftiyên kurdan hedef digirin û xwestin ku ev êriş bên rawestandin.

 

DESTKEFTÎ HEDEF TÊN GIRTIN

 

Hevseroka Rêxistina Partiya Herêmên Demokratîk (DBP) ya Amedê Sûltan Yarayê diyar kir ku bi êrişên li dijî Rêveberiya Xweser a Bakur û Rojhilatê Sûriyeyê destkeftiyên gelê kurd hedef tên girtin û got: “Gelê kurd li Rojavayê pergaleke nû ava kir. Hemû nasnameyên li wir dikarin xwe bi hêsanî îfade bikin. Ev destkeftî bi pêşengiya gelê kurd û jinên kurd pêk hat. Di pêşengiya kurdan de jiyaneke komînal, wekhev hat afirandin. Armanca van êrişan destkeftiyên gelê kurd ên bi têkoşînên mezin bi dest xistin bi xwe ne. Em van êrişan şermezar dikin."

 

Sûltan Yarayê diyar kir ku her çend êriş wekî ku ji aliyê komên paramîlîter ve hatine kirin bên nîşandan jî, dewlet li pişta wan e û got: “Dîmenên ku di medyaya dîjîtal de tên belavkirin, nîşaneya binpêkirina mafên mirovan e. Li Rojavayê sûcên li dijî mirovahiyê tên kirin. Ji ber vê yekê ez van êrişan şermezar dikim û bang li Tirkiyeyê û dewletên din dikim: Dest ji dijminatiya xwe ya li kurdan berdin. Dewlet û desthilatên ku dijminatiya kurdan dikin mehkûmî tunebûnê ne."

 

‘PARADÎGMAYEKE KU JI ROJHILATA NAVÎNÊ RE BIBE MÎNAK'

 

Hevserokê Partiya Wekhevî û Demokrasiyê ya Gelan (DEM) ê Amedê Abbas Şahîn bi bîr xist ku gelê kurd ê li Rojhilata Navînê bûye 4 parçe, bi salan e rastî komkujî, zext û zordariyê tê. Şahîn bal kişand ku gelê kurd ê li Sûriyeyê bi salan rastî zilma rejîma Baasê hatiye û got: “Rejîma Baasê bi dehan salan rê neda ku gelê kurd bi nasnameya xwe bijî û nasname jî neda wan. Êş û qetlîamên giran hatin kirin. Tevî van zextan jî gelê kurd li Rojavayê paradîgmayeke ku wê ji Rojhilata Navînê re bibe mînak pêk anî."

 

Şahîn bi bîr xist ku pergala demokratîk a li Bakur û Rojhilatê Sûriyeyê hatiye avakirin ji aliyê gelên cîhanê ve jî hatiye dîtin û got: “Li Sûriyeyê rejîmeke faşîst, dîktatorî hat rûxandin. Rejîma ku divê şûna vê dîktatoriyê bigire divê rejîmeke demokratîk be. Divê Sûriyeyeke demokratîk bê avakirin û gelên di nava Sûriyeya Demokratîk de xwedî nasnameya xwe bin û di nava sîstemê de xwedî biryar bin. Şahîn êrişên li dijî sivîlan jî şermezar kir."

 

Hevserokê Komeleya Alîkarî û Piştevaniya bi Kesên di Dergûşa Şaristaniyan de Xizmên xwe Wenda kirine re (MEBYA-DER) Mehmet Emîn Kiliç jî diyar kir ku armanca êrişan jiyana nû ya kurdan e. Kiliç da zanîn ku destkeftiyên kurdan û gelên herêmê hedef hatine girtin û got: “Di salên 2017-2018’an de bi êrişan Efrîna aram talan kirin, demografiya wê xera kirin û avahiya wê ya dîrokî hilweşandin. Ji ber ku niha perwerde bi tirkî û erebî tê dayîn, pergala perwerdeyê jî hilweşandin. Kurdî ji zimanê perwerdehiyê hat derxistin. Ravekirina vê yekê tune ye. Yanî çima pergala perwerdeyê ya li Efrîna ku kurd û ereb lê dijîn tirkî ye? Tirk li wir çi dikin?"

 

Kiliç ku got "Jiyana aştiyane ya gelan kabûsa pergala kapîtalîst e" got: "Îro rûxandina rejîma Sûriyeyê bi awayekî vekirî nîşan da ku fikra neteweya demokratîk tekane rê ye. Neteweya demokratîk dermanê Rojhilata Navînê ye. Ji ber vê yekê ditirsin ku xwerêveberî û berfirehkirina neteweya demokratîk ji kapîtalîzmê re cih nehêle. Ji ber vê yekê êrişî Rojavayê û destkeftiyên wê dikin. Yekîtiya gelên bindest dikare vî şerî rawestîne. Tenê têkoşîna hevpar a hemû gelan bi taybetî jî ya kurdan dikare van êrişan rawestîne."