Komîsyona Mafê Mirovan a Meclisê angaştên derpkirinê lêkolîn nekir

2022-01-18 10:22:40


	ENQERE - Komîsyona Mafê Mirovan a Meclisê, di rapora xwe ya ku derbarê serdanên xwe yên girtîgehên Tarsûs û Bunyanê de amade kir de angaştên derpkirinê lêkolîn nekir. 

	Endamên Komîsyona Jêr a Lêkolîna Mafê Girtî û Hikumxwaran a girêdayî Komîsyona Mafê Mirovan a Meclisê, di navbera 7-8'ê mijdara 2021'an de serdana kampûsa Girtîgehên Bunyanê ya Qeyseriyê û di navbera 12-13'ê mijdara 2021'an de serdana Kampûsa Girtîgeha Tarsûsê kiribûn. Komîsyonê van hevdîtinên xwe weke du rapor amade kir. Li ser van her du raporan hevdîtin hatin kirin û hatin qebûlkirin. 

	 

	Di raporan de jin û zarok jî di nav de derbarê hejmara girtiyên li girtîgehan de agahî hatine dayîn û binpêkirinên li girtîgehan li pey hev hatine rêzkirin. 

	 

	BINPÊKIRINÊN MAFAN ÊN DI RAPORAN DE

	 

	Li gorî raporan, li girtîgehan ev binpêkirin hene:

	 

	* Girtî ji qantînan xurek gelek biha dikirin.

	 

	* Di derketina girtiyan a revîrê de prisgirêk hene.

	 

	* Rojnameyan nadin girtiyan û mafê wan ên werzîşê asteng dikin.

	 

	* Porê girtiyan bi yek rengî traş dikin. 

	 

	* Girtiyan dikin odeya bisingir.

	 

	* Li girtiyan didin. 

	 

	* Amûrên çêkirina resman nadin girtiyan. 

	 

	* Destê girtiyan bi pişt ve kelemçe dikin.

	 

	* Dema tedawiyê kelemçeyan ji destê girtiyan dernaxin.

	 

	* Pirtûkên kurdî nadin girtiyan. 

	 

	* Daxwaznameyên girtiyan nayên bersivandin. 

	 

	HDP'Ê ŞERH DANÎ SER HER DU RAPORAN

	 

	Parlamentera HDP'ê ya Mersînê Fatma Kûrtûlan ku endamê komîsyonê ye û tevlî serdanên girtîgehan bûye şerh danî ser raporên ku hatine amadekirin û qebûlkirin. Kûrtûlan, di şerha xwe de diyar kiriye ku girtiyan ji wan re ragihandiye ku kincên wan bi temamî ji wan hatine kirin û bi vî awayî li ser wan hatiye gerandin û girtiyên ku li dijî vê derketine gardiyanan li wan daye. Kûrtûlan, daye zanîn ku endamên komîsyonê bi girtiyên ku gotine gardiyanan li wan daye re hevdîtin nekirine û di raporê de cih ji lêdana girtiyan re nehatiye veqetandin. 

	 

	DAXWAZA RAKIRINA TECRÎDÊ

	 

	Kûrtûlan, di şerha xwe de cih daye daxwaza rakirina tecrîda li ser Rêberê PKK'ê Abdullah Ocalan a girtiyan û têkildarî mijarê gotiye ku girtiyan bertekê nîşanî tecrîda li ser Ocalan daye û ji wan re ragihandine ku bi daxwaza rakirina tecrîdê ketine greva birçîbûnê û xwestine ku tecrîda li ser Ocalan bê bidawîkirin. 

	 

	MA / Berîvan Altan