Serokkomarê Şîliyê Garbrîel Borîc: Kurd tên qirkirin  

2021-12-22 13:42:15


	 

	NAVENDA NÛÇEYAN - Gabrîel Borîc ku bi serkeftineke dîrokî bû Serokkomarê Şîliyê, di hevpeyvîneke xwe de diyar kir ku li Tirkiyeyê kurd tên qirkirin. 

	 

	Di 19'ê kanûnê de li Şîliyê tûra duyemîn a Hilbijartina Serokkomariyê hat kirin. Di hilbijartinê de namzetê "Tifaqa Em Piştgiriyê Didin Pêbaweriyê" Gabrîel Borîc ji sedî 55,87'ê dengan girt û bi serket. Hevrikê Borîc namzetê Partiya Komarparêz Jose Antonio Kast ku dîktatoriya leşkerî diparêze jî ji sedî 44,13'yê dengan girt û têk çû. Gabrîl ku ji malbateke katalan û hirvat tê bi serkeftina xwe bû serokê herî ciwan ê Şîliyê. 

	 

	'DEWLETA QIRKER'

	 

	Borîc ku tevlî bernameya televîzyonekê bû, pirsa "Hûn dibêjin Îsraîl dewleteke qirker û kujer e?" wiha bersivand: "Belê rast e." Li ser pirsa "Li dijî kurdan Tirkiye jî wisa ye?" ev bersiv da: "Teqez."  

	 

	Axaftina ku di navbera pêşkêşvan û Borîc de derbas dibe wiha ye; 

	 

	Pêşkêşvan: We got Îsraîl kujer û qirker e. Hûn li pişt vê gotina xwe ne?

	 

	Borîc: Bêlê rast e.

	 

	Pêşkêşvan: Hûn ji bo kurdên li Tirkiyeyê jî vê dibejin?

	 

	Borîc: Belê, ev ji bo hemû welatan wiha ye. Îsraîl, Erebistana Siûdî û Tirkiye ku mafê mirovan bin pê dikin divê şertê navneteweyî bi cih bînin. Bihêzbûna van welatan ne pir girîng e, divê mafê van neteweyan bê parastin.