Ji DEM Partiyê giştînameya 1’ê Gulanê  

2026-04-13 11:15:19


	ENQERE - DEM Partiyê di Giştînameya 1’ê Gulanê de li dijî kedxwarî, şer û zextê banga têkoşîna hevpar kir. 

	 

	Partiya Wekhevî û Demokrasiyê ya Gelan (DEM Partî), Giştînameya 1’ê Gulanê Cejna Karkeran a Cîhanê weşand. Giştîname bi dirûşma “Ji bo ked, aştî û edaletê ber bi 1’ê Gulanê ve” hate weşandin. Di giştînameyê de hate gotin ku ew 1’ê Gulana îsal bi êrişkariya emperyal, şer, krîza aborî, kedxwarî û bêîstiqrariya siyasî pêşwazî dikin. 

	 

	Di giştînameyê de krîza aborî, xizanî, hejarî, kedxwarî û pirsgirêkên din ên li Tirkiyeyê hatin rêzkirin û hate gotin ku îktîdar li dijî vê rewşê mafên sendîkayî, xwerêxistinkirin û grevê qedexe dike. 

	 

	Her wiha Pêvajoya Aştî û Civaka Demokratîk a ji hêla Rêberê Gelê Kurd Abdullah Ocalan ve hatiye desptêkirin bi bîr xist û got ku Abdullah Ocalan ji bo ked, wekhevî, edalet, azadiya jinê û têkoşîna ekolojîk nexşerêyê pêşkeş dike. Hat gotin ku bêyî aştiyê ked azad nabe, bêyî demokrasiyê jî wekhevî nabe û li dijî kedxwarî, şer û xizaniyê banga têkoşîna hevpar hate kirin. Her wiha DEM Partî dê xebatên 1’ê Gulanê îro bide destpêkirin. 

	 

	DEM Partiyê di çarçoveya xebatên 1’ê Gulanê de ev biryar da: 

	 

	"* Hemû xebat dê bi dirûşma ‘Ji bo ked, aştî û edaletê ber bi 1’ê Gulanê ve’ bên kirin. 

	 

	* Dê li Amed û Wanê mitîngên navendî bên lidarxistin û. Ji bajarên derdorê dê tevlibûn nebe û her bajar xwe li gorî hêza xwe birêxistin bike. 

	 

	* Li Tirkiye û Kurdistanê dê bi beşdariya hêzên ked û demokrasiyê xebat bên kirin û hedef mitîngên xurt û bicoş e. 

	 

	* Tax bi tax, kolan bi kolan, mal bi mal dê xebat bên kirin. 

	 

	* Pankart dê li avahiyên bajar û navçeyan, li cade, rawestgeh û qadan bê daliqandin. 

	 

	* Li febrîqe, OSB, qadên çandiniyê, atolyeyên tekstîlê, şantiye, maden, sektora turîzmê û li bazaran stand bên danîn, belavok bên belavkirin, bi karkeran hevdîtin bên kirin û bangên meşan bên kirin. 

	 

	* Ji bo keda jinê û keda nava malê bêhtir bê bînayîkirin dê bi Meclisên Jinan re xebatên hevpar bên meşandin. 

	 

	* Bi karkerên ciwan, zarokên karker û bêkaran re hevdîtinên taybet bên kirin. 

	 

	 * Dê piştevaniyê bidin berxwedanên karkeran ên herêmî û grevan. 

	 

	 * Dê bi têkoşîna ekolojiyê re têkilî bê danîn û li dijî talankirina xwezayê deng were bilindkirin. 

	 

	* Platformên medyaya dijîtal û çapemenî dê çalak were bikaranîn.”